Koronarávvagat jienasteaddjiide guovlluválggain

Čuovo dáid rávvagiid jienastanbáikkis

  • Ane doarvái gaskka eará olbmuide.
  • Fuolat gieđaid buhtisvuođas, Geavat giehtadoidosa.
  • Geavat jienastanbáikkis ámadadjosuoji dahje ámadadjovisiirra, jus dat lea vejolaš.
  • Jus háliidat, sáhtát váldit mielde iežat peanna. 
  • Jus dus leat vuoigŋanoalledávdamearkkat, vuordde daid buorráneami ovdalgo jienastat ovddalgihtii.

Ná doaimmat, jus leat karanteanas dahje erremis dahje dus leat vuoigŋanoalledávdamearkkat

Jienasteaddjiid, geain leat vuoigŋanoalledávdamearkkat ja leat karanteanas dahje erremis, várás leat plánen sierradoaimmaid jienasteami vejolažžan dahkamii. Doaimmat leat gitta das, buohccágo jienasteaddji ovdajienasteami áigge vai válgabeaivve. Doaimmat sáhttet molsašuddat gielddaid mielde. Čuovo iežat gielddat válgadieđiheami.

Ovdajienastanáigge

Jus dus leat vuoigŋanoalledávdamearkkat, vuordde dávdamearkkaid buorráneami ovdalgo jienastat ovddalgihtii. Vuoigŋanoalledávdamearkkat jávkagohtet sulaid vahku siste dávdamearkkaid álgimis.

Jus leat doaktára mearridan karanteanas dahje erremis, ále boađe ovdajienastanbáikái, muhto vuordde karanteana dahje erreme nohkama ovdalgo jienastat. 

Válgabeaivve

Jus dus leat válgabeaivve vuoigŋanoalledávdamearkkat dahje leat iešdáhtolaš dahje doaktára mearridan karanteanas, jienas jienastanbáikki rávvagiid mielde. Dáin dáhpáhusain jienasteapmi galggašii dáhpáhuvvat almmá kontávtta haga eará olbmuiguin ja ámadadjosuoji geavahemiin oppa áigge. 

Jus dieđát, ahte válgabeaivvi áigge leat doaktára mearridan karanteanas dahje erremis, ále boađe sisa válgabáikái, muhto váldde oktavuođa gieldda válgavirgeoapmahaččaide vejolašvuođas jienastit olgun. Doaktára mearridan karanteanas dahje erremis lean olmmoš ii oaččo vuolgit ruovttustis jienastanbáikái, jus dat ii leat vejolaš almmá kontávttaid haga eará olbmuiguin. Jus dus leat garra dávdamearkkat, amma anát fuola iežat ja earáid dearvvašvuođas ja bisut ruovttus.

Geahča maiddái: Jearaldagat ja vástádusat guovlluválggain

Guovlluválggat 2022 leat nuppit válggat, mat ordnejuvvojit koronapandemiija áigge. Gielddaválggain 2021 jienastanbáikkiin čuvvo máŋggabealat ordnemiid, maiguin dorvvastedje jienasteami koronaepidemiijadilis fuolatkeahttá.

Guovlluválggaid dearvvašvuođadoaimmat vuođđuduvvet gielddaválggain ožžojuvvon vásáhusaide. Vuoigatvuođaministeriija ja Dearvvašvuođa ja buresveadjima lágádus (DNL) váldet guovlluválggaid ordnemiin vuhtii epidemiijadili ovdáneami. Alla njoammunmeriin fuolatkeahttá guovlluválggaid dilli giđa gielddaválggaid ektui lea earálágan. Guovlluválggat doaimmahuvvojit ođđajagimánus 2022, goas buohkat jietnavuoigadahtton olbmot leat háliidettiin geargan oažžut unnimustá guokte koronaboahku. Boahkut suddjejit bures eandalii duođalaš dávdahámi vuostá. DBL:a árvvoštallamiid mielde jienasteapmi lea vuollegaš riskka doaibma.

Guovlluválggat doaimmahuvvojit epidemiijadilis gáibidan ordnemiiguin. Vuoigatvuođaministeriija ja DBL leat gárvvistan ovttasbarggus rávvagiid gielddaide válggaid dearvvasvuođadorvvolaš jienasteamis koronaáigge. Jus báikkálaš dearvvašvuođavirgeoapmahaččat addet čavggabut rávvagiid, dat čuvvojuvvojit vuoigatvuođaministeriija ja DBL:a rávvagiid sajis.

Áigedási diehtu koronavirusdilis Dearvvašvuođa- ja buresveadjima lágádusa neahttasiidduin.