EU-válggat sotnabeaivve 9.6.2024

Europarlameantaválggat dahjege EU-válggat ordnejuvvojit Suomas sotnabeaivve 9.6.2024. Válggain válljejuvvojit Suomas Eurohpá parlamentii 15 lahtu viđa jahkái. Evttohasat leat evttohassan olles riikkas.

Ovdajienasteapmi ordnejuvvo Suomas 29.5.–4.6.2024 olgoriikkain 29.5.–1.6.2024.

EU-válggaid válgabeaivvi jietnavuoigadahtton sáhttá jienastit dušše dan jienastanbáikkis, mii máinnašuvvo jietnavuoigatvuođaalmmuhusas. Ovddalgihtii sáhttá jienastit vaikko guđe almmolaš ovdajienastanbáikkis.

Jietnavuoigatvuohta EU-válggain

EU-válggain jietnavuoigatvuohta lea juohkehaččas Suoma riikkavuložis dahje Suomas ássi ja jietnavuoigatvuođaregistarii iežas almmuhan EU-riikkavuložis, guhte lea deavdán 18 jagi maŋimustá 9.6.2024. Jietnavuoigadahtton oažžu jienastit dušše ovtta EU:a lahttoriikkas: juogo iežas ruovtturiikkas dahje dan stáhtas, gos ássá. Boahttevaš válggain jietnavuoigadahtton olbmot leat sullii 4,5 miljovnna.

Digi- ja álbmotdiehtodoaimmahat sádde almmuhusa jietnavuoigatvuođas jietnavuoigadahtton olbmuide maŋimustá 16.5.2024.

Jo badjel miljovnna jienasteaddji ožžot jietnavuoigatvuođaalmmuhusa Suomi.fi -bálvalussii

Jietnavuoigatvuođaalmmuhusat sáddejuvvojit juogo poastta fárus dahje elektrovnnalaččat jietnavuoigadahtton olbmo iežas almmuhusa mielde. Njealjádas jietnavuoigadahtton olbmuin leat diŋgon eiseválddiid dieđáhusaid elektrovnnalaččat ja almmuhus jietnavuoigatvuođas sáddejuvvo sidjiide Suomi.fi-dieđáhusaide. Suomi.fi-dieđáhusaide boahtán almmuhusaid sáhttá lohkat dovdámiin Suomi.fi-neahttabálvalussii dahje váldimin geavahussii Suomi.fi-mobiilaheivehusa.

Evttohasat

Helssega válgabirelávdegoddi nanne EU-válggaid evttohasásahallama 10.5.2024, man maŋŋá evttohasat ja sin evttohasnummirat gávdnojit vuoigatvuođaministeriija diehto- ja boađusbálvalusas. Evttohasat leat evttohassan olles riikkas.

Identitehta duođašteapmi jienastanbáikkis

Jienasteaddji galgá čujuhit čielggadusa identitehtastis jienastanbáikkis. Identitehta sáhttá duođaštit virggálaš govalaš áššegirjjiin, dego vuodjinkoarttain dahje bolesa mieđihan persovdnakoarttain ja pássain.

Ovdajienasteapmi ruovtturiikkas ja olgoriikkain

Jietnavuoigadahtton olmmoš sáhttá jienastit ovddalgihtii man beare almmolaš ovdajienastanbáikkis ruovtturiikkas dahje olgoriikkain.

Ruovtturiikka ja olgoriikkaid ovdajienastanbáikkiid čujuhusat ja rabasáiggit gávdnojit vuoigatvuođaministeriija diehto- ja boađusbálvalusas.

Vuoigatvuođaministeriija nuvttá bálvalannummiris sáhttá jearrat EU-válggaid ovdajienastanbáikkiin ja jienasteamis. Telefonbálvalusas oktavuođadieđut leat: 

• Suomagielat bálvalannummir 0800 9 4770
• Ruoŧagielat bálvalannummir 0800 9 4771
• WhatsApp-bálvalus nummiris 050 438 8730.

Olmmoš, gean nákca lihkadit ja doaibmat lea nu rádjašuvvan, ahte son ii beasa ieš jienastanbáikái almmá govttohis váttisvuođaid haga, sáhttá jienastit ovddalgihtii ruovttustis. Ruovttujienasteapmái galgá almmuhit iežas gieldda guovddášválgalávdegoddái maŋimustá maŋŋebárgga 28.5.2024 ovdal diibmu 16. 

Olgoriikkain olles ovdajienastanáigge ja válgabeaivvi orron ja orodan olbmot sáhttet jienastit reivve bokte olgoriikkain. Jietnavuoigadahtton olmmoš, gii háliida jienastit reivve bokte, diŋgo reivejienastanáššegirjjiid ovddalgihtii olgoriikkaide. Go son lea ožžon daid, de son jienasta ja máhcaha iežas jiena poastta fárus Supmii iežas gieldda guovddášválgalávdegoddái. Reivejietna galgá leat boahtán rivttes guovddášválgalávdegoddái maŋimustá bearjadaga 7.6.2024 ovdal diibmu 19. Dárkilut rávvagat gávdnojit čujuhusas www.vaalit.fi/kirjeaanestys

Jienasteapmi válgabeaivve 9. geassemánu

Válgabeaivve buot jienastanbáikkit leat rabas diibmu 9–20. Válgabeaivve oažžu jienastit dušše jietnavuoigatvuođaalmmuhussii merkejuvvon jienastanbáikkis. Iežas válgabeaivvi jienastanbáikki sáhttá ohcat maiddái čujuhusa vuođul DVV:a jienastanbáikebálvalusas čujuhusas www.aanestyspaikat.fi. Bálvalus leahkkasa ovdal miessemánu beallemuttu.

Bohtosa rehkenastin

Ovdajienaid rehkenastin álggahuvvo jo válgabeaivve jienasteami áigge. Válgabeaivvi jienaid álgorehkenastin álggahuvvo jo dalánaga go válgalanjat giddejuvvojit. Rehkenastima guoskevaš álgodieđut almmustahttojuvvojit válgaeahkeda diibmu 20 rájes, goas ovdajienaid rehkenastin lea oaivvilduvvon leat gárvvis. Válggaid álgobohtosat gárvánit eahkeda ja ija áigge. 

Dárkkistanrehkenastin čađahuvvo válgabirelávdegottiin válgabeaivvi čuvvon vuossárgga  10.6. Helssega válgabirelávdegoddi nanne válggaid olles riikka bohtosa ja čállá válljejuvvon olbmuide váldegirjjiid gaskavahku 12.6.

Eurohpá parlameantta ođđa doaibmabadji álgá virggálaččat maŋŋebárgga 16.7.2024. Aiddo válljejuvvon parlameantta lahttut čoahkkanit dalle ortniiduvvančoahkkimis Strasbourgas, gos válljejuvvojit ságadoalli, 14 várreságadoalli ja vihtta ráđđeaddi lahtu.

Lassedieđut:
sierraáššedovdi Laura Nurminen, tel. 02951 50008, [email protected] 
sierraáššedovdi Elina Rissanen, tel. 02951 50248, [email protected]
válgajođiheaddji Arto Jääskeläinen, tel. 02951 50128, [email protected]

Diehtu ja bohtosat vuoigatvuođaministeriija diehto- ja boađusbálvalusas

• Ovdajienastanbáikkit ja daid rabasáiggit
• Evttohasat ja evttohasnummirat (10.5.)
• Ovddalgihtii jienastan olbmuid mearri (beaiváduvvo diimmu gaskkaid, maiddái vahkuloahpa) 
• Álgorehkenastima ovdáneapmi válgaeahkeda áigge
• Nannejuvvon bohtosat dárkkistanrehkenastima gárváneami maŋŋá gaskavahku 12.6.

Diehtu EU-válggain ja jienasteamis www.vaalit.fi 
Vaalit.fi Facebookkas www.facebook.com/vaalit.fi  
EU-válgasiidu: https://elections.europa.eu/fi 
Diehtopáhkka válggain journalisttaide: https://www.europarl.europa.eu/news/fi/press-room/press-tool-kit

Dieđáhus lea divvojuvvon 8.5. dmu 16.10. Dieđáhustekstii lea lasihuvvon máinnašupmi das, ahte DVV:a jienastanbáikebálvalus leahkkasa ovdal miessemánu beallemuttu.