Riikkabeaiveválggat 2023

Riikkabeaiveválggat ordnejuvvojit juohke njealját jagi. Válggain Suoma riikkavuložat válljejit riikkabeivviide 200 áirasa mearridit min oktasaš áššiideamet birra.

Riikkabeivviid barggut

Riikkabeivviid dehálamos bargu lea ásahit lágaid, maid mielde servvodat doaibmá.

Nubbi riikkabeivviid dehálaš bargu lea mearridit stáhta bušeahttaárvalusas. Bušeahttaárvalusas meroštallojuvvo, mas stáhta oažžu ruđaid ja masa ruđat geavahuvvojit. Riikkabeaivvit maid bearráigeahččá stáhta ruhtageavaheami. Riikkabeaivvit vállje riikka ráđđehussii oaiveministara ja bearráigeahččá ráđđehusa doaimma. Dasa lassin riikkabeaivvit mearrida, maid stáhta oaivvilda máŋggain Eurohpa uniovnna áššiin.

Jagi 2023 riikkabeaiveválggat ordnejuvvojit
sotnabeaivve 2.4.2023.
Ovdajienasteapmi dollojuvvo Suomas 22.-28.3.2023
ja olgoriikkain 22.-25.3.2023.

Geas oaččun veahki?

Válgavirgeolbmot rávvejit ja veahkehit dárbbu mielde du jienastanbáikkis ovddalgihtii jienasteamis ja válgabeaivve buot diliin.

Jienastanbáikkis lea maiddái válgaveahkkebargi. Don sáhtát bivdit su mielde jienastanskurbmui veahkkin, juos it ieš sáhte deavdit jienastanlihpu.

Válgaveahkkin sáhttá doaibmat maid olmmoš, gean don leat ieš válljen, ovdamearkka dihte oapmahaš dehe lagaš olmmoš. Válgaveahkki ii goitge oaččo leat evttohas dehe evttohasa lagaš olmmoš. Válgaveahkki ii oaččo muitalit geasage, gean don jienastit.

Válgasuollemasvuohta

Juohkehaš mearrida ieš, háliidago jienastit ja gean jienasta.

Válgasuollemasvuohta mearkkaša dan, ahte don it dárbbaš muitalit geasage, gean don jienastat. Válgasuollemasvuođa dihte don deavddát jienastanlihpo jienastanskurpmus.

Gii oažžu jienastit?

Don sáhtát jienastit riikkabeaiveválggain, juos

• don leat Suoma riikkavuloš; ja
• don leat deavdán 18 jagi maŋimusat 2.4.2023.

Jienastanriekteilmmuhus boahtá dutnje ruoktot

Juos dus lea riekti jienastit, nu oaččut das reivve ruoktot. Reivves lea jietnarievtti ilmmuhus, mas lea diehtu iežat jienastanbáikkis válgabeaivve. Mielde čuovvu maiddái logahallan ovdajienastanbáikkiin.

Don oaččut ilmmuhusgoartta elektrovnnalažžan, juos don leat váldán atnui Digi- ja álbmotdiehtovirgedoaimmahaga fállan elektrovnnalaš kommunikašuvdnabálvalusa dehege Suomi.fi-dieđáhusaid (lassidieđut čujuhusas www.suomi.fi/viestit). Jienastanriekteilmmuhusa it
vealttakeahttá dárbbat váldit mielde jienastanbáikái, identitehtaduođaštus reahkká.

Gean don sáhtát jienastit?

Suopma lea juhkkojuvvon 13 válgabiirii. Juohke válgabiirres leat iežas evttohasat. Don sáhtát jienastit olbmo, guhte lea evttohassan riikkabeaiveválggain iežat válgabiirres. Du iežat válgabiire ilmmuhuvvo jienastanriekteilmmuhusas.

Du iežat válgabiirre evttohasaid nummárat leat oidnosis jienastanbáikkiin ja jienastanskurpmus. Oaččut evttohasain dieđu ovdamearkka dihte aviissain, televišuvnnas ja interneahtas.

Ruovttus jienasteapmi

Juos don leat buohcci dehe jienastanbáikái mannan dehe doppe jienasteapmi livččii mearihis váttis, nu don sáhtát jienastit ruovttus ovdajienastanáigge.

Don fertet ilmmuhit iežat ruovttus jienasteapmái 21.3.2023 diibmu 16 rádjái iežat gieldda guovddášválgalávdegoddái. Guovddášlávdegotti telefonnummár lea mielde jienastanriekteilmmuhusas. Don oaččut válgalávdegottis maid lassidieđuid ruovttus jienasteami birra.

Ná sáhtát jienastit ovddalgihtii

Don sáhtát válljet, jienastatgo jienastanbeaivve vai ovddalgihtii. Don sáhtát jienastit riikkabeaiveválggain ovddalgihtii man beare ovdajienastanbáikkis Suomas dehe olgoriikkain.

Váldde jienasteapmái fárrui identitehtaduođaštusa, mas lea govva, ovdamearkka dihte pássa, persovdnagoartta dehe vuodjingoartta.

1. Čájet identitehtaduođaštusa válgavirgeolbmui. Virgeolmmoš dárkkista dan ja addá dutnje jienastanlihpu.
2. Mana jienastanskurbmui. Čále jienastanlihppui čielgasit dan evttohasa nummára, gean don jienastat. Ale čále jienastanlihppui maidege eará.
3. Máhco jienastanlihpu guovdu.
4. Máhca válgavirgeolbmo lusa. Son steampilastá du jienastanlihpu ja addá dutnje ruškes válgakonfaluhta. Bija jienastanlihpu konfaluhttii ja liibme konfaluhta gitta.
5. Válgavirgeolmmoš bivdá, ahte don vuolláičálát skovi. Vuolláičállosiin don nannet, ahte don leat ieš deavdán jienastanlihpu, ožžon dasa steampila ja gidden dan konfaluhttii.
6. Loahpas virgeolmmoš gidde válgakonfaluhta ja skovi fiskes sáddenkonfaluhttii.

Ná jienastat válgabeaivve

Válgabeaivve 2.4.2023 jienastanbáikkit leat rabas diibmu 9-20.

Dárkkis iežat jietnariekteilmmuhusas, gos du jienastanbáikát lea. Válgabeaivve don sáhtát jienastit dušše dan jienastanbáikkis, mii lohká du jienastanriekteilmmuhusas.

Váldde jienasteapmái mielde identitehtaduođaštusa, mas lea govva, ovdamearkka dihte pássa, persovdnagoarta dehe vuodjingoarta.

1. Čájet identitehtaduođaštusa válgavirgeolbmui. Virgeolmmoš dárkkista dan, ohcá du nama válgalogahallamis ja addá dutnje jienastanlihpu.
2. Mana jienastanskurbmui. Čále jienastanlihppui čielgasit dan evttohasa nummára, gean don jienastat. Ale čále jienastanlihppui maidege eará.
3. Máhco jienastanlihpu guovdu.
4. Máhca válgavirgeolbmo lusa. Son steampilastá jienastanlihpu.
5. Gahčat iežat lihpu válgaurdnii.

Jienas riikkabeaiveválggain!

Lassidiehtu válggain: vaalit.fi

Don sáhtát jearrat válggain ja jienasteamis maid riekteministeriija bálvalannummáris 0800 9 4770.