Ovdâskoddevaaljah 2023

Ovdâskoddevaaljah tuállojeh jyehi niäljád ive. Vaaljâin Suomâ aalmugjesâneh väljejeh ovdâskoodán 200 aalmugovdâsteijed meridiđ mii ohtsijn aašijn.

Ovdâskode pargoh

Ovdâskode tehálumos pargo lii asâttiđ laavâid, moi mield ohtsâškodde tuáimá.

Nubbe tehálâš ovdâskode pargo lii meridiđ staatâ budjetist. Budjetist miäruštâleh, ete kost staatâ finnee ruuđâid já moos ruuđah kiävttojeh. Ovdâskodde meid kocá staatâ ruttâkevttim. Ovdâskodde väljee staatâ haldâttâsân uáiviminister já kocá haldâttâs tooimâ. Lasseen ovdâskodde meerrid, ete mon uáivilist Suomâ staatâ lii maaŋgâin Euroop union aašijn.

Ive 2023 ovdâskoddevaaljah uárnejuvvojeh
pasepeeivi 2.4.2023.
Munejienâstem lii Suomâst 22.-28.3.2023
já olgoenâmijn 22.-25.3.2023.

Kiäst tun finniih iše?

Valjâvirgeulmuuh rävvejeh já išedeh tuu táárbu mield jienâstemsaajeest munejienâstmist já valjâpeeivi puoh tiilijn.

Jienâstemsaajeest lii meid valjâišedeijee. Tun puávtáh táttuđ suu išán jienâstemkoopin, jis tun jieh jieš paste tevdiđ jienâstemliipu.

Valjâišedeijen puáhtá toimâđ meid olmooš, kiäm tun lah jieš valjim, ovdâmerkkân omâhâš tâi aldaolmooš. Valjâišedeijee ij uážu kuittâg leđe iävtukkâs tâi iävtukkâs aldaolmooš.
Valjâišedeijee ij uážu muštâliđ kiässán, ete kiäm tun jienâstih.

Valjâsyeligâsvuotâ

Juáháš meerrid jieš, ete haalijd-uv jienâstiđ já kiäm jienâst.

Valjâsyeligâsvuotâ uáivild tom, ete tun jieh taarbâš muštâliđ kiässán, ete kiäm tun jienâstah. Valjâsyeligâsvuođâ tiet tun tiävdáh jienâstemliipu jienâstemkoopist.

Kii uážžu jienâstiđ?

Tun uážuh jienâstiđ ovdâskoddevaaljâin,

  • jis tun lah Suomâ aalmugjeessân; já
  • jis tun lah tiävdám 18 ihheed majemustáá 2.4.2023.

Jienâvuoigâdvuotâalmottâs puátá pááikán

Jis tust lii vuoigâdvuotâ jienâstiđ, te tun finniih tast pááikán reeivâ. Reeivâst lii jienâvuoigâdvuotâalmottâs, mast lii tiätu tuu jienâstemsaajeest valjâpeeivi. Mieldi lii meid luvâttâllâm munejienâstemsoojijn.

Tun finniih almottâskoortâ šleđgâlâžžân, jis tun lah váldám anon Digi- já aalmugtiätuvirgáduv faallâm šleđgâlii viestâdempalvâlus ađai Suomi.fi-saavah (lasetiäđuh čujottâsâst www.suomi.fi/viestit). Jienâvuoigâdvuotâalmottâs tun jieh veltihánnáá taarbâš fárustâd jienâstemsajan, persovntuođâštus lii tuárvi.

Kiäm tun puávtáh jienâstiđ?

Suomâ lii juohhum 13 valjâpirrâdâhân. Jyehi valjâpirrâduvâst láá jieijâs iävtukkâsah. Tun puávtáh jienâstiđ ulmuu, kote lii iävtukkâssân ovdâskoddevaaljâin tuu jieijâd valjâpirrâduvâst. Tuu jieijâd valjâpirrâdâh almottuvvoo jienâvuoigâdvuotâalmottâsâst.

Jieijâs valjâpirrâduv iävtukkâsâi numereh láá uáinimnáál jienâstemsoojijn já jienâstemkoopist. Tun finniih iävtukkâsâin tiäđu ovdâmerkkân loostâin, televisiost já internetist.

Päikkijienâstem

Jis tun lah pyeccee tâi jienâstemsajan moonnâm tâi tobbeen jienâstem ličij merettes vaigâd, te tun puávtáh jienâstiđ pääihist munejienâstemääigi.

Tun koolgah almottâttâđ päikkijienâstmân 21.3.2023 tijme 16 räi jieijâd kieldâ kuávdášvaljâlävdikoodán. Kuávdášvaljâlävdikode puhelinnummeer lii jienâvuoigâdvuotâalmottâsâst. Tun finniih kuávdášvaljâlävdikoddeest meid lasetiäđu päikkijienâstmist.

Návt tun jienâstah muuneeld

Tun puávtáh valjiđ, ete jienâstah-uv jienâstempeeivi vâi muuneeld. Tun puávtáh jienâstiđ ovdâskoddevaaljâin muuneeld mon peri munejienâstemsaajeest Suomâst tâi olgoenâmijn.

Vääldi jienâstmân mieldi koválii persovntuođâštus, ovdâmerkkân passâ, persovnkorttâ tâi vyeijimkorttâ.

  1. Čääiti persovntuođâštus valjâvirgeulmui. Valjâvirgeolmooš täärhist tom já addel tunjin jienâstemliipu.
  2. Moonâ jienâstemkoopin. Čääli jienâstemliipun čielgâsávt ton iävtukkâs nummeer, kiäm tun jienâstah. Ele čääli jienâstemliipun maiden muide.
  3. Maaccâst jienâstemliipu kaskoo.
  4. Maacâ valjâvirgeulmuu luus. Sun stemppâlist jienâstemliipu já addel tunjin ruškis valjâkooveert. Piejâ jienâstemliipu kovertân já lijmii kooveert kiddâ.
  5. Valjâvirgeolmooš táttu, ete tun vuáláčáláh luámáttuv. Vuáláčalluin tun nonniih, ete tun lah jieš tiävdám jienâstemliipu, finnim toos stemppâl já toppim tom kovertân.
  6. Loopâst virgeolmooš tappa valjâkooveert já luámáttuv fiskis vuolgâttâskovertân.

Návt tun jienâstah valjâpeeivi.

Valjâpeeivi 2.4.2023 jienâstemsajeh láá áávus tijme 9-20.

Täärhist jienâvuoigâdvuotâalmottâsâst, ete kost tuu jienâstemsaje lii. Valjâpeeivi tun puávtáh jienâstiđ tuš ton jienâstemsaajeest, mii lohá tuu jienâvuoigâdvuotâalmottâsâst.

Vääldi jienâstmân mieldi koválii persovntuođâštus, ovdâmerkkân passâ, persovnkorttâ tâi vyeijimkorttâ.

  1. Čääiti persovntuođâštus valjâvirgeulmui. Valjâvirgeolmooš täärhist tom, ocá tuu noomâ valjâluvâttâlmist já addel tunjin jienâstemliipu.
  2. Moonâ jienâstemkoopin. Čääli jienâstemliipun čielgâsávt ton iävtukkâs nummeer, kiäm tun jienâstah. Ele čääli jienâstemliipun maiden muide.
  3. Maaccâst jienâstemliipu kaskoo.
  4. Maacâ valjâvirgeulmuu luus. Sun stemppâlist jienâstemliipu.
  5. Kooččât tuu jienâstemliipu valjâuurnán.

Jienâst ovdâskoddevaaljâin!

Lasetiätu vaaljâin: vaalit.fi 

Tun puávtáh koijâdiđ vaaljâin já jienâstmist meid riehtiministeriö palvâlemnumerist 0800 9 4770.