Kuávlu- já kieldâvaaljah 2025
Kuávlu- já kieldâvaaljah uárnejuvvojeh siämmáá-áigásávt cuáŋuimáánust 2025. Jienâstmáin tun vaiguttah toos, kiäh merideh tehálijn, juáhháá aargân kyeskee aašijn čuávuvái neelji ive ääigi.
- Kuávluvaaljâin väljejuvvojeh airâseh kuávluváldustiivrân. Sij merideh pyereestvaijeemkuávlui sosiaal- já tiervâsvuođâpalvâlusâi já kááijumtooimâ orniimist.
- Kieldâvaaljâin väljejuvvojeh airâseh kieldâ váldustiivrân. Sij merideh kieldâ tooimâst já ekonomiast.
Helsigliih jienâsteh tuš kieldâvaaljâin, tastko Helsig ij kulluu mongin pyereestvaijeemkuávlun. Helsigist sosiaal- já tiervâsvuođâpalvâlusâin sehe kááijumtooimâst västid kaavpug.
Luuvâ lase kuávlu- já kieldâvaaljâin sehe jienâstmist távjá koijâdum koččâmušâin
Ive 2025 kuávlu- já kieldâvaaljâi äigitavlu
Valjâpeivi pasepeivi 13.4.2025
Munejienâstem Suomâst 2.–8.4.2025.
Munejienâstem olgoenâmijn 2.–5.4.2025
Tun puávtáh jienâstiđ jo-uv muuneeld tâi valjâpeeivi
Tiäđu munejienâstempaaihijn tun kaavnah riehtiministeriö tiätu- já puáđuspalvâlusâst (uđđâivemáánu 2025 loopâbeln).
Tiäđu valjâpeeivi jienâstempääihist tun kaavnah jienâvuoigâdvuotâalmottâsâst, mii vuolgâttuvvoo tunjin, já čujottâsuuccâm vuáđuld Digi- já aalmugtiätuvirgáduv jienâstempäikkipalvâlusâst 18.3.2025 rääjist.
Návt tun jienâstah muuneeld siämmáá-áigásijn kuávlu- já kieldâvaaljâin
Návt tun jienâstah valjâpeeivi siämmáá-áigásijn kuávlu- já kieldâvaaljâin
Lasetiäđuid jienâstmist tun finniih nuuvtá palvâlemnumerist 0800 9 4700 (suomâ- já eŋgâlâskielâ) já 0800 9 4771 (ruotâ- já eŋgâlâskielâ) sehe WhatsApp-viestâpalvâlusâst 050 438 8730. Palvâlus lekkâs 1.2.2025.
Kii uážžu jienâstiđ?
- Kuávluvaaljâin jienâvuoigâdvuođâliih láá Suomâ, eres EU-jeessânstaatâi já Island já Taažâ aalmugjesâneh, kiäh ääsih pyereestvaijeemkuávlust já kiäh láá tiävdám 18 ihheed majemustáá valjâpeeivi 13.4.2025. Toos lasseen jienâvuoigâdvuođâliih kuávluvaaljâin láá pyereestvaijeemkuávlust ässee eres olgoeennâmliih tiätu iävtuiguin. Helsiglijn ij lah jienâvuoigâdvuotâ
- Kieldâvaaljâin jienâvuoigâdvuođâliih láá Suomâ, eres EU-jeessânstaatâi já Island já Taažâ aalmugjesâneh, kiäh ääsih kieldâst já kiäh láá tiävdám 18 ihheed majemustáá valjâpeeivi 13.4.2025. Toos lasseen jienâvuoigâdvuođâliih kieldâvaaljâin láá kieldâst ässee eres olgoeennâmliih tiätu iävtuiguin.
Lasetiäđuh jienâvuoigâdvuođâst kuávlu- já kieldâvaaljâin
Almottâs jienâvuoigâdvuođâst
Jis tust lii vuoigâdvuotâ jienâstiđ, te tunjin vuolgâttuvvoo jienâvuoigâdvuotâalmottâs. Jienâvuoigâdvuotâalmottâs vuolgâttuvvoo jo-uv poostâ peht tâi šleđgâlávt Suomi.fi-palvâlusân. Lasetiäđuid palvâlusâst tun kaavnah čujottâsâst suomi.fi/viestit.