Jienâstem olgoenâmijn

Jis tun lah olgoenâmijn munejienâstem já valjâpeeivi ääigi tun puávtáh jienâstiđ jo-uv Suomâ ovdâstâsâin, reiváin tâi syemmilijn taampâin. 

Olgosyemmiliih ađai olgoenâmijn pisovávt ässee jienâvuoigâdvuođâliih láá jienâvuoigâdvuođâliih ovdâskoddevaaljâin já presidentvaaljâin sehe meid europarlamentvaaljâin, jis sij iä almottât jieijâs aassâmstaatâ valjâluvâttâlmân. Olgosyemmiliih iä lah jienâvuoigâdvuođâliih kieldâvaaljâin já kuávluvaaljâin.

Reivâjienâstem 

Sij, kiäh ääsih tâi oroh olgoenâmijn oles munejienâstempaje já valjâpeeivi, pyehtih jienâstiđ almolijn vaaljâin reiváin olgoenâmijn. Olgosyemmiliist ađai fastâ olgoenâmijn ässest ij lah jienâvuoigâdvuotâ kieldâ- já kuávluvaaljâin. 

Jienâvuoigâdvuođâlâš, kote haalijd reivâjienâstem, tiiláá reivâjienâstemäššikiirjijd riehtiministeriö tiilámpalvâlusâst olgoenâmáid, taid finnim maŋa jienâst já maacât jienâs vuolgâttâskovertist Suomân jieijâs päikkikieldâ kuávdášvaljâlävdikoodán vaaljâi mield miäruštâllum meriääigi siste. Reivâjienâstemäššikiirjijd puáhtá tiiláđ tolemustáá kulmâ mánuppaje ovdil valjâpeeivi.