Mainna lágiin sáhttá jienastit
Don sáhtát jienastit juogo ovdal válggaid ovdajienasteamis dehe válgabeaivve. Don sáhtát jienastit dušše aktii. Válgabeaivve don sáhtát jienastit dušše dan jienastanbáikkis, mii lea merkejuvvon dutnje sáddejuvvon jienastanriekteilmmuhussii.
Ovdajienastanáigge sáhtát jienastit ovddalgihtii man fal ovdajienastanbáikkis ruovttueatnamis dehe olgoriikkain. Ovdajienastanbáikkit leat
- ruovttueatnamis gielddaid mearridan ovdajienastanbáikkit
- máŋggat Suoma ovddastagat olgoriikkain
- lágádusat, dego buohcceviesut, sosiálafuolahusa doaibmaovttadagat ja ráŋggaštanlágádusat. Lágádusain sáhttet jienastit dušše olbmot, geat leat váldojuvvon dohko dikšuma váste dehe daidda váldojuvvon olbmot.
- suopmelaš dámppat, mat leat olgoriikkain ovdajienasteami áigge. Dámpajienasteamis oažžu jienastit dušše dámppa bargoveahka, mátkkošteaddjit eai sáhte jienastit dámppas.