Guovllu- ja gielddaválggat sotnabeaivve 13.4.2025
Guovllu- ja gielddaválggat doaimmahuvvojit sotnabeaivve 13.4.2025. Ovdajienasteapmi ordnejuvvo Suomas 2.-8.4.2025 ja olgoeatnamiin 2.-5.4.2025
Guovlluválggain válljejuvvojit áirasat guovllustivrraide, main lea ovddasvástádus buresbirgenguovlluid sosiála- ja dearvvasvuohtabálvalusaid sihke gádjundoaimma ordnemis. Gielddaválggain válljejuvvojit áirasat gielddaid gielddastivrraide, mat mearridit gieldda doaimmas ja ekonomiijas.
Helssetlaččat ja ålándalaččat leat spiehkastat
Helssetlaččat ja ålándalaččat eai jienas guovlluválggain. Helssega gávpot ja Ålánda eai gula mange buresbirgenguvlui, muhto dat fuolahit guovllusteaset sosiála- ja dearvvašvuohtafuolahusas sihke gádjundoaimmas.
Gielddaválggat eai doaimmahuvvo Ålándda eanangottis seamma áigge go eará sajes Suomas, muhto čuovvovaš háve čakčat 2027.
Geat sáhttet jienastit guovllu- ja gielddaválggain?
Guovlluválggain jienastanvuoiggalaččat leat buresbirgenguovllus orru Suoma, eará EU-lahttoriikkaid sihke Islándda ja Norgga riikkavuložat, geat leat deavdán 18 jagi maŋemusat válgabeaivve 13.4.2025. Dasa lassin jienastanvuoiggalaččat leat buresbirgenguovllus 18 jagi deavdán eará olgoeatnanlaččat, juos sii leat orron Suomas boatkkaheamit unnimusat guokte jagi. Helssetlaččain ii leat jienastanriekti guovlluválggain.
Gielddaválggain jienastanvuoiggalaččat leat gielddas orru Suoma, eará EU-lahttoriikkaid sihke Islándda ja Norgga riikkavuložat, geat leat deavdán 18 jagi maŋemusat válgabeaivve 13.4.2025. Dasa lassin jienastanvuoiggalaččat leat gielddas orru ja 18 jagi deavdán eará olgoeatnanlaččat, juos sii leat orron Suomas boatkkaheamit unnimusat guokte jagi.
Dasa lassin jienastanvuoiggalaččat leat dihto eavttuid mielde buresbirgenguovllus ja gielddas orru olbmot, geat leat EU ja riikkaidgaskasaš organisašuvnnaid bálvalusas, ja sin bearašlahtut.
Digi- ja álbmotdiehtovirgedoaimmahat lea sádden dieđáhusa jienastanrievttis juogo reiven ruoktot dehe elektrovnnalaččat Suomi.fi-bálvalussii. Juo 1,5 miljovnna jienastanvuoiggalačča ožžot dáin válggain dieđáhusa jienastanrievttis Suomi.fi-bálvalussii.
Evttohasat
Jienasteaddjit jienastit guovlluválggain iežaset buresbirgenguovllu evttohasaid ja gielddaválggain iežaset ruovttugieldda evttohasaid.
Juohke evttohasas lea iežas evttohasnummár. Guovlluválggaid evttohasaid nummárat álget nummáris 2002 ja gielddaválggaid evttohasaid nummárat álget nummáris 2. Dieđut evttohasain gávdnojit fierpmis válggaid diehto- ja boađusbálvalusas.
Bellodatregisterii merkejuvvon bellodagat ja jienastanvuoiggalaččaid vuođđudan válljejeaddjesearvvit sáhttet ásahit evttohasaid.
Identiteahta duođašteapmi jienastanbáikkis
Jienasteaddji ferte čájehit čilgehusa identiteahtastis jienastanbáikkis. Identiteahtta sáhttá duođaštuvvot virggálaš govalaš áššegirjjiin, dego vuodjingoarttain dehe bolesa mieđihan persovdnagoarttain ja bássain.
Ovdajienasteapmi ruovttueatnamis ja olgoeatnamis
Jienastanvuoiggalaš sáhttá jienastit ovddalgihtii man beare almmolaš ovdajienastanbáikkis ruovttueatnamis dehe olgoeatnamiin.
Ruovttueatnama ja olgoeatnama ovdajienastanbáikkiid čujuhusat ja rabasáiggit gávdnojit válggaid diehto- ja boađusbálvalusas ja DVV jienastanbáikebálvalusa www.aanestyspaikat.fi.
Ovdajienastanbáikkiin ja maiddái eará guovllu- ja gielddaválggaid áššiin sáhttá jearrat riekteministeriija nuvttá telefonbálvalusas:
• suomagielalaš bálvalus nummáris 0800 9 4770
• ruoŧagielalaš bálvalus nummáris 0800 9 4771
• WhatsApp-dieđáhusbálvalus nummáris 050 438 8730.
Olmmoš, gean nákca lihkadit ja doaibmat lea nu ráddjejuvvon, ahte son ii beasa mearehis váttisvuođaid haga jienastanbáikái, sáhttá jienastit ovddalgihtii ruovttustis. Ruovttujienasteapmái galgá dieđihit iežas gieldda guovddášválgalávdegoddái maŋemusat disdaga 1.4.2025 ovdal diibmu 16.00.
Olgoeatnamiin oba ovdajienastanáigodaga ja válgabeaivvi orrut dehe orodeaddjit sáhttet jienastit reivve bakte olgoeatnamiin. Jienastanvuoiggalaš, guhte háliida jienastit reivve bakte, galgá diŋgot reivejienastanáššebáhpiriid ovddalgihtii olgoeatnamii, ja go lea ožžon daid, de jienasta ja boste jienas Supmii iežas gieldda guovddášválgalávdegoddái. Reivejietna galgá ollet iežas ruovttu- dahje veahkadatgirjedoalu válgalávdegoddái maŋemusat bearjadaga 11.4.2025 ovdal diibmu 19. Dárkilit rávvagat gávdnojit čujuhusas www.vaalit.fi/kirjeaanestys.
Jienasteapmi válgabeaivve cuoŋománu 13. beaivve
Válgabeaivve visot jienastanbáikkit leat rabas diibmu 9-20. Válgabeaivve sáhtát jienastit dušše Suomas ja dušše jienastanriektedieđáhussii merkejuvvon jienastanbáikkis. Iežas válgabeaivvi jienastanbáikki sáhttá maid ohcat iežas fásta čujuhusa vuođul DVV jienastanbáikebálvalusas čujuhusas www.aanestyspaikat.fi.
Boađusrehkenastin álggahuvvo válgabeaivve ja válggaid nannejuvvon bohtosat ožžojuvvojit ga 16.4.
Boađusrehkenastin álgá válgabeaivve. Ovdajienaid rehkenastin álggahuvvo jienasteami áigge ja válgabeaivvi jienaid álgorehkenastin álggahuvvo dakkaviđe go válgalanjat giddejuvvojit. Rehkenastima álgodieđut almmostuhttojuvvojit válgaeahkeda diibmu 20 rájes. Válggaid álgobohtosat gárvánit eahkeda ja ija áigge. Guovllu- ja gielddaválggain leat eatnat evttohasat, mii sáhttá njoahcudit bohtosiid oažžuma válgaeahkeda áigge.
Guovllu- ja gielddaválggaid jienaid dárkkistanrehkenastin dáhpáhuvvá válgabeaivvi maŋit mánnodaga 14.4. Válggaid nannejuvvon bohtosat ožžojuvvojit gaskavahku 16.4.
Válggain válljejuvvon guovllustivrraid ja gielddastivrraid doaibmanáigodat álgá geassemánu 1. beaivve 2025.
Lassidieđut:
sierraáššedovdi Laura Nurminen, tel. 02951 50008, [email protected]
sierraáššedovdi Elina Rissanen, tel. 02951 50248, [email protected]
válgahoavda Arto Jääskeläinen, tel. 02951 50128, [email protected]
Válggaid diehto- ja boađusbálvalus
- Ovdajienastanbáikkit ja daid rahpanáiggit
- Evttohasat ja evttohasnummárat
- Ovddalgihtii jienasteddjiid mearit (beaiváduvvojit diimmu gaskkaid, maid vahkkoloahpaid)
- Preliminára rehkenastima ovdáneapmi válgaeahkeda áigge
- Nannejuvvon bohtosat go dárkkistanrehkenastin válmmasnuvvá ga 16.4.
Diehtu guovllu- ja gielddaválggain sihke jienasteamis
Digi- ja álbmotdiehtovirgedoaimmahaga jienastanbáikebálvalus
Buresbirgenguovllu ohcanbálvalus
Vaalit.fi Facebookas
Válgavideot Youtubes
