Kuávlu- já kieldâvaaljah pasepeeivi 13.4.2025
Kuávlu- já kieldâvaaljah toimâttuvvojeh pasepeeivi 13.4.2025. Munejienâstem uárnejuvvoo Suomâst 2.–8.4.2025 já olgoenâmijn 2.–5.4.2025.
Kuávluvaaljâin väljejuvvojeh airâseh kuávluváldustivráid, moh västideh pyereestvaijeemkuávlui sosiaal- já tiervâsvuotâpalvâlusâi sehe kááijumtooimâ orniimist. Kieldâvaaljâin väljejuvvojeh airâseh kieldâi váldustivráid, moh merideh kieldâ tooimâin já ekonomiast.
Helsigliih já ålandliih láá spiekâstâh
Helsigliih já ålandliih iä jienâst kuávluvaaljâin. Helsig kaavpug já Åland iävá kuulâ monnân pyereestvaijeemkuávlun, peic toh huolâttává kuávlustis sosiaal- já tiervâsvuotâhuolâttâsâst sehe kááijumtooimâst.
Kieldâvaaljah iä toimâttuu Åland eennâmkoddeest siämmáá ääigi ko mudoi Suomâst, peic čuávuváá tove čohčuv 2027.
Kiäh pyehtih jienâstiđ kuávlu- já kieldâvaaljâin?
Kuávluvaaljâin jienâvuoigâdvuođâliih láá pyereestvaijeemkuávlust ässee Suomâ, eres EU-jeessânstaatâi sehe Island ja Taažâ aalmugjesâneh, kiäh láá tiävdám 18 ihheed majemustáá valjâpeeivi 13.4.2025. Lasseen jienâvuoigâdvuođâliih láá pyereestvaijeemkuávlust ässee eres olgoeennâmliih, jis sij láá aassâm Suomâst potkânhánnáá ucemustáá kyehti ive. Helsiglijn ij lah jienâvuoigâdvuotâ kuávluvaaljâin.
Kieldâvaaljâin jienâvuoigâdvuođâliih láá kieldâst ässee Suomâ, eres EU-jeessânstaatâi sehe Island ja Taažâ aalmugjesâneh, kiäh láá tiävdám 18 ihheed majemustáá valjâpeeivi 13.4.2025. Lasseen jienâvuoigâdvuođâliih láá kieldâst ässee eres olgoeennâmliih, jis sij láá aassâm Suomâst potkânhánnáá ucemustáá kyehti ive.
Lasseen jienâvuoigâdvuođâliih láá tiätu iävtuiguin pyereestvaijeemkuávlust já kieldâst ässee EU já almugijkoskâsij ornijduumij palvâlusâst leijee ulmuuh já sii perruujesâneh.
Digi- já aalmugtiätuvirgádâh lii vuolgâttâm almottâs jienâvuoigâdvuođâst jo-uv reivân pááikán tâi šleđgâlávt Suomi.fi-palvâlusân. Jo 1,5 miljovn jienâvuoigâdvuođâlâžžâd finnejeh täin vaaljâin jienâvuoigâdvuotâalmottâsâs Suomi.fi-palvâlus viestáid.
Iävtukkâsah
Jienâsteijeeh jienâsteh kuávluvaaljâin jieijâs pyereestvaijeemkuávlu iävtukkâsâid já kieldâvaaljâin jieijâs päikkikieldâ iävtukkâsâid.
Jyehi iävtukkâsâst lii jieijâs iävtukkâsnummeer. Kuávluvaaljâi iävtukkâsâi numereh älgih numerist 2002 já kieldâvaaljâi iävtukkâsâi numereh älgih numerist 2. Tiäđuh iävtukkâsâin kávnojeh viermist vaaljâi tiätu- já puáđuspalvâlusâst.
Piäládâhregisterân merkkejum piäláduvah já jienâvuoigâdvuođâlij vuáđudem väljejeijeeseervih pyehtih asâttiđ iävtukkâsâid.
Identiteet tuođâštem jienâstemsaajeest
Jienâsteijee kalga adeliđ čielgâdâs identiteetistis jienâstemsaajeest. Identiteet puáhtá tuođâštiđ virgáláin kováláin äššikirjijn, tegu vyeijimkorttáin tâi poolis mieđettem persovnkorttáin já passáin.
Munejienâstem päikkienâmist já olgoenâmijn
Jienâvuoigâdvuođâlâš puáhtá jienâstiđ muuneeld mon peri almolii munejienâstemsaajeest päikkienâmist tâi olgoenâmijn.
Päikkieennâm já olgoeennâm munejienâstemsoojij čujottâsah já ávusorroomääigih kávnojeh vaaljâi tiätu- já puáđuspalvâlusâst já DVV jienâstemsajepalvâlusâst www.aanestyspaikat.fi.
Munejienâstemsoojijd já meiddei eres kuávlu- já kieldâvaljáid lahtojeijee aašijd puáhtá koijâdiđ riehtiministeriö mávsuttes puhelinpalvâlusâst:
• suomâkielâlâš palvâlus numerist 0800 9 4770
• ruotâkielâlâš palvâlus numerist 0800 9 4771
• WhatsApp-viestâpalvâlus numerist 050 438 8730.
Olmooš, kiän naavcah lihâdiđ já toimâđ láá nuuvt rájášum, ete sun ij peesâ jienâstemsajan merettes vädisvuođâittáá, puáhtá jienâstiđ muuneeld päihistis. Päikkijienâstmân kalga almottâttâđ jieijâs kieldâ kuávdášvaljâlävdikoodán majemustáá majebaargâ 1.4.2025 ovdil tijme 16.
Olgoenâmijn oles munejienâstemääigi já valjâpeeivi ässeeh tâi orodeijeeh pyehtih jienâstiđ reiváin olgoenâmijn. Jienâvuoigâdvuođâlâš, kote haalijd jienâstiđ reiváin, ferttee tiiláđ reivâjienâstemäššikiirjijd muuneeld olgoenâmáid, toi finnim maŋa jienâstiđ já vuolgâttiđ jienâs Suomân jieijâs kieldâ kuávdášvaljâlävdikoodán. Reivâjienâ kalga leđe puáttám jieijâs päikki- tâi aalmugreekkigtuálukode kuávdášvaljâlävdikoodán majemustáá vástuppeeivi 11.4.2025 ovdil tijme 19. Täärhib ravvuuh kávnojeh čujottâsâst www.vaalit.fi/kirjeaanestys.
Jienâstem valjâpeeivi 13. cuáŋuimáánu
Valjâpeeivi puoh jienâstemsajeh láá áávus tijme 9–20. Valjâpeeivi puáhtá jienâstiđ tuše Suomâst já tuše jienâvuoigâdvuotâalmottâsân merkkejum jienâstemsaajeest. Jieijâs valjâpeeivi jienâstemsaje puáhtá uuccâđ meiddei jieijâs fastâ čujottâs vuáđuld DVV jienâstemsajepalvâlusâst čujottâsâst www.aanestyspaikat.fi.
Puáđusrekinistem algâttuvvoo valjâpeeivi já vaaljâi nannejum puátuseh finnejuvvojeh ko 16.4.
Puáđusrekinistem álgá valjâpeeivi. Munejienâi rekinistem algâttuvvoo jienâstem ääigi já valjâpeeivi jienâi vuáđusteijee rekinistem algâttuvvoo tállân valjâviistij steŋgim maŋa. Rekinistmân kyeskee vuáđusteijee tiäđuh almostittojeh valjâehidist tijme 20 rääjist. Vaaljâi vuáđusteijee puátuseh kiergâneh eehid já iijâ ääigi. Kuávlu- já kieldâvaaljâin láá valjeest iävtukkâsah, mii sáttá hitodiđ puátusij finnim valjâehidist.
Kuávlu- já kieldâvaaljâi jienâi tärhistemrekinistem tábáhtuvá valjâpeeivi čuávvoo vuossaargâ 14.4. Vaaljâi nannejum puátuseh finnejuvvojeh koskoho 16.4.
Vaaljâin väljejum kuávluváldustiivrâi já kieldâi váldustiivrâi toimâpaje álgá 1. peeivi kesimáánu 2025.
Lasetiäđuh:
spesialäššitobdee Laura Nurminen, puh. 02951 50008, ovdânommâ.suhânommâ@gov.fi
spesialäššitobdee Elina Rissanen, puh. 02951 50248, ovdânommâ.suhânommâ@gov.fi
valjâjođetteijee Arto Jääskeläinen, puh. 02951 50128, ovdânommâ.j.suhânommâ@gov.fi
Vaaljâi tiätu- já puáđuspalvâlus
- Munejienâstemsajeh já toi ávusorroomääigih
- Iävtukkâsah já iävtukkâsnumereh
- Muuneeld jienâstâm ulmui mereh (peividuvvojeh tijme kooskâi, meiddei oholoopâ)
- Vuáđusteijee rekinistem ovdánem valjâeehid ääigi
- Nannejum puátuseh tärhistemrekinistem kiergânem maŋa ko 16.4.
Tiäđuh kuávlu- já kieldâvaaljâin sehe jienâstmist
Digi- já aalmugtiätuvirgáduv jienâstemsajepalvâlus
Pyereestvaijeemkuávlu uuccâmpalvâlus
Vaalit.fi Facebookist
Valjâvideoh Youtubest
