Parlameʹnttvaal pâʹsspeeiʹv 2.4.2023

oikeusministeriö
Julkaisuajankohta 16.3.2023 9.30
Tiedote

Parlameʹnttvaal tååimtet 2. njuhččmannu 2023. Vaalin jiõnnvuõiggâdvuõttneeʹǩǩ Lääʹdd meerla vaʹllje 200 parlameʹnttneʹǩǩed nellj eeʹjj piʹštti vaalpâjja.

Parlameʹnttvaali diõtt Lääʹddjânnam lij juõkkum 13 vaalvoudda. Vaalvuuʹdi mieʹldd vaʹlljem parlameʹnttniiʹǩǩi mieʹrr lij ǩidd tõʹst, mii lij vaalvuuʹdest jälsteei Lääʹdd meerlai lååkkmieʹrr kutt määnpââʹj ooudbeäʹlnn vaali. Ålaand vaalvuuʹdest vaʹlljeet kuuitâǥ tåʹlǩ õhtt parlameʹnttneǩ.

Juõʹǩǩ Lääʹdd meerlast, kååʹtt mââimõõzzâst vaalpeiʹvven teâudd 18 eeʹǩǩed, lij vuõiggâdvuõtt jiõnsted parlameʹnttvaalin. Iʹlmmtõs jiõnstemvuõiggâdvuõđâst lij puättam Digi- da meerteâttkonttrest juʹna ǩeʹrjjen domoi leʹbe liâdǥlânji Suomi.fi-kääzzkõʹsse. Iʹlmmtõõzz vuõltteeš liâdǥlânji tõid, kook liâ tiʹllʼjam veʹrǧǧneǩteâđtõõzzid Suomi.fi-kääzzkõʹsse.

Jiõnnvuõiggâdvuõttiʹlmmtõʹsse lij miõrkkum vaalpeeiʹv jiõnstempäiʹǩǩ. Meâlddõssân lij še loǥstõk jiijjâs vaalvuuʹd ouddjiõnstempaaiʹǩin.

Parlameʹnttvaalin vuäitt jiõnsted juʹna vaalpeiʹvven pâʹsspeeiʹv 2.4. leʹbe ooudbeäʹlnn ouddjiõnstemtempoddân 22.–28.3. Jiõnsted vuäitt tåʹlǩ jiijjâs vaalvuuʹdest eeʹttǩeeʹjen åårrai oummu. Jiijjâs vaalvuʹvdd peäggtet jiõnnvuõiggâdvuõttiʹlmmtõõzzâst.

Jiõnsteei âlgg čuäʹjted čiõlǥtõs persoonvuõđstâs nuʹt vaalpeeiʹv jiõnstummšest ǥu še ouddjiõnstummšest. Persoonvuõđ vuäitt tuõđšted veerǥlaž snimldõõǥǥ õõʹnni äʹššǩiiʹrjin, mâʹte vuejjamkoortin leʹbe pååʹles miõttmin persoonkoortin da paassin.

Ouddjiõnstummuš dommjânnmest da ålggjânnmin

Jiõnnvuõiggâdvuõttneǩ vuäitt jiõnsted ooudbeäʹlnn koʹst täättas õõlmâs ouddjiõnstempääiʹǩest dommjânnmest leʹbe ålggjânnmin.

Parlameʹnttvaali ouddjiõnstummuš dommjânnmest älgg seärad 22.3. da põõtt mââibaarǥ 28.3. Ålggjânnmin ouddjiõnstummuš tååimtet 22.–25.3., leša määŋgain ålggjânnam ouddjiõnstempaaiʹǩin jiõnstemäiʹǧǧpodd lij tän vuäʹnkab.

Dommjânnam da ålggjânnam ouddjiõnstempaaiʹǩi addrõõzz da äävaiåårramääiʹj käunnʼje vaali teâtt- da puäđõskääzzkõõzzâst. Teâđ käunnʼje še DVV jiõnstempäiʹǩǩ-kääzzkõõzzâst addrõõzzâst https://www.aanestyspaikat.fi. Ouddjiõnstempaaiʹǩid vuäitt teâđstõõllâd še määusteʹmes vaalkääzzkõsnââmrest:

  • lääʹddǩiõllsaž teʹlfonkääzzkõs: 0800 9 4770
  • ruõccǩiõllsaž teʹlfonkääzzkõs: 0800 9 4771
  • WhatsApp-saakk-kääzzkõs: 050 438 8730.

Ooumaž, koon pâstlvažvuõtt liikkeed da toiʹmmjed lij nuʹt ǩeäppnam, što son ij piâzz mååžnteʹmes vaiggâdvuõđitaa ouddjiõnstempäikka leʹbe vaalpeeiʹv jiõnstempäikka, vuäitt jiõnsted ooudbeäʹlnn dååma. Dommjiõnstummša âlgg iʹlmmtõõttâd jiijjâs kååʹdd väʹlddvaal-luʹvddkådda mââimõõzzâst 21.3. ouddâl čiâss 16. Dommjiõnstummuž õhttvuõđâst vuäitt tiõttum õudldõõzzin jiõnsted še roodnairuåđpeâmmai, kååʹtt jäälast seämma täälast.

Ålggjânnmin veeʹzz ouddjiõnstemääiʹjpoodd da vaalpeeiʹv jälsteei leʹbe ååreei vueiʹtte jiõnsted ǩeʹrjjpååʹštin ålggjânnmin. Jiõnnvuõiggâdvuõttneeʹǩǩest, kååʹtt haaʹlad jiõnsted ǩiiʹrjin, âlgg tiʹllʼjed ǩeʹrjj-jiõnstemäʹššǩeeʹrj ooudbeäʹlnn ålggjânnmid, tõid vuäǯǯeen jiõnast da mââimõsân pååʹštad jiõnâs Lääʹddjânnma jiijjâs kååʹdd väʹlddvaal-luʹvddkådda. Ǩeʹrjj-jiõnn âlgg leeʹd jiijjâs väʹlddvaal-luʹvddkååʹddest mââimõõzzâst vaalpeeiʹv oudldõõʹsti piâtnâc 30.3. ouddâl čiâss 19. Tääʹrǩab vuäppõõzz käunnʼje addrõõzzâst www.vaalit.fi/kirjeaanestys.

Jiõnstummuš vaalpeiʹvven 2. njuhččmannu

Vaalpeiʹvven puk 2.4.2023 jiõnstempääiʹǩ liâ äävai čiâss 9–20.

Vaalpeiʹvven vuäǯǯ jiõnsted tåʹlǩ jiõnnvuõiggâdvuõttiʹlmmtõʹsse miõrkkum jiõnstempääiʹǩest. Jiijjâs vaalpeeiʹv jiõnstempääiʹǩ vuäitt ooccâd še addrõõzz vuâđald DVV jiõnstempäiʹǩǩ-kääzzkõõzzâst addrõõzzâst https://www.aanestyspaikat.fi.

Puäđõõzz laʹsǩǩummuž

Ouddjiõni laʹsǩǩummuž altteet juʹn vaalpeeiʹv jiõnstummuž ååreen jååttmõõžžâst. Vaalpeeiʹv jiõni laʹsǩǩummuž altteet tâʹlskani vaalkueʹrnci ǩidd mõõneen. Laʹsǩǩummuž kuõskki vuâđđeei teâđaid õlmstââʹttet čiâss 20 ääʹljeeʹl, kuäʹss ouddjiõni laʹsǩǩummuž õõlǥči leeʹd vaalmâš. Vaali vuâđđeei puäđõõzz valmštâʹvve jeäʹǩǩää da iin poodd. 

Täʹrǩstemlaʹsǩǩummuž spraavât vaalvuʹvddluʹvddkooʹddin vaalpeeiʹv puõʹtti vuõssarggân 3.4. Vaalvuʹvddluʹvddkååʹdd raavee seärad 5.4. vaali loopplaž puäđõõzzid.

Vaalin vaʹlljum parlameʹntt alttad tuâjas maaibâârǥ 11.4.

Teâđ parlameʹnttvaalin liâ taʹrjjeemnalla määŋgain ǩiõlin

Vaalit.fi- seiddõõzzâst liâ teâđ parlameʹnttvaalin jeeʹres ǩiõlin (lääʹdd, ruõcc, nuõrttsääʹmm, aanarsääʹmm, tâʹvvsääʹmm, lääʹdd da lääʹddruõcc sieʹvvemǩiõll di määŋg jäänmõsân õnnum veeʹresǩiõl, jm. eŋgglõs, arabia, eesti da ruõšš).

Vuõiggâdvuõttministeria YouTube -kanaalâst käunnʼje lââʹssen čiõlgg- da sieʹvvemǩiõllsa video jiõnstummšest. Lääddas da ruõccâs liâ vuäǯǯamnalla čiõlggbrosyyr. Vaalin teâđtet še suåvlaž hämmsest oummuid, ǩeäin lij vuäinnvââʹǩǩ.

Vaalteäggtummšest tuejjeem iʹlmmtõs VTV:ja

Parlameʹnttneʹǩǩen vaʹlljum da väärrparlameʹnttniiʹǩǩin âlgg tuejjeed riikktääll vuåppâmkonttra iʹlmmtõs vaalteäggtõõzzâst. Iʹlmmtõs âlgg uʹvdded mââimõõzzâst 5.6.2023 mõõneeʹst. Lââʹssteâđ vaalteäggtõsiʹlmmtõõzzin addrõõzzâst www.vaalirahoitus.fi.

Lââʹssteâđ:
vaaljååʹđteeʹjj Arto Jääskeläinen, teʹl. 02951 50128, [email protected]
spesiaaläʹšštobddi Laura Nurminen, teʹl. 02951 50008, [email protected]

Vaalit.fi Twittrest https://twitter.com/VaalitFI
Vaalit.fi Facebookâst https://www.facebook.com/vaalit.fi 
Vaalvideoid Youtubest https://www.youtube.com/user/oikeusministerio/playlists 

Teâđ da puäđõõzz vaalseeidain www.vaalit.fi

  • Teâđ ouddjiõnstempaaiʹǩin da tõi äävaiåårramaaiʹjin
  • Teâđ eeʹttǩeeʹjin da eeʹttǩeeinââmar. Eeʹttǩeeiteâđ liâ vuäǯǯamnalla še laaddâmnalla åårrai teâttõssân. 
  • Ouddjiõnstummuž poodd vaalseeidaid peeiʹvtet čiâss kõõskin (še neäʹttel-loppân) teâđaid ooudbeäʹlnn jiõnsteei meäʹrin kooʹddi mieʹldd, vaalvuuʹdi mieʹldd da veeʹzz jânnmest. 
  • Seiddõõzzâst vuäitt seuʹrrjed vuâđđeei laʹsǩǩummuž ouddnummuž vaaljeäʹǩǩää 2.4. poodd. Vuâđđeei laʹsǩǩummuž valmštõõđeen vaalseeidain säärnat vuâđđeei jiõnnlaʹsǩǩummuž mieʹldd parlameʹnttneʹǩǩen vaʹlljum nõõm da jiõnnmeäʹr. Lââʹssen säärnat peällõõǥǥi jiõnnmeäʹr da jiõnnvuässõõzz veeʹzz jânnmest, vaalvuuʹdin da kooʹddin. Ǥu vuâđđeei laʹsǩǩummuš lij vaalmâš, seeidaid šâʹdde puki eeʹttǩeeʹji jiõnnmeäʹr di jiõnstemvuuʹd meâldlaž teâđ. Vuâđđeei laʹsǩǩummuž puäđõõzz õlmstââʹttet laʹsǩǩummuž valmštõõđeen še laaddâmnalla åårrai teâttõssân.
  • Raavuum puäđõõzz peeiʹvtet vaalseeidaid täʹrǩstemlaʹsǩǩummuž valmštõõđeen seärad 5.4.