Teâđaid presideʹnttvaalin da jiõnstummšest
Lääʹddjânnam meerla vaʹlljee presideeʹnt
vaalin kuuđ eeʹjj kõõskin.
Presideʹnttvaalin vueiʹtte leeʹd kueʹhtt jiõnstummuž.
Jõs õhtt võboršiiʹǩǩin vuäǯǯ vuõssmõs jiõnstummšest
jäänab ǥu peäʹl uvddum jiõnin,
suu vaʹlljeet vuõiʹǧǧest presideʹntten.
Presideʹnttvaalin riâžžât nuʹbb jiõnstummuš,
jõs ij ni kååʹtt võboršeǩ vuäǯǯ
vuõssmõs jiõnstummšest pâʹjjel peäʹl jiõnin.
Nuʹbb jiõnstummuš riâžžât
tõi kueiʹt võboršeeʹǩǩ kõõsk,
kook vuõǯǯu vuõssmõs jiõnstummšest jäänmõsân jiõnid.
Vuõssmõs jiõnstummuš:
Vaalpeiʹvv lij pâʹsspeiʹvv 28.1.2024.
Ouddjiõnstummuš lij Lääʹddjânnmest 17.–23.1.2024.
Ouddjiõnstummuš ålggjânnmin lij 17.–20.1.2024.
Vueiʹtlvaž nuʹbb jiõnstummuš:
Vaalpeiʹvv lij pâʹsspeiʹvv 11.2.2024.
Ouddjiõnstummuš lij Lääʹddjânnmest 31.1.–6.2.2024.
Ouddjiõnstummuš ålggjânnmin lij 31.1.–3.2.2024.
Presideeʹnt tuâj
Presideʹntt jååʹđat Lääʹddjânnam ålggpolitiikk
õõutsââʹjest halltõõzzin.
Presideʹntt raavad laaʹjjid,
koid parlameʹntt lij priimmâm.
Presideʹntt nõõmat väʹlddministeeʹr
da jeeʹres ministeeʹrid jiijjâs tuâjaid.
Lââʹssen son nõõmat suʹvddjid da
måttmid õll veʹrǧǧniiʹǩǩid.
Son tuʹmmai vääinast da rääuhast.
Presideʹntt taarbaš kuuitâǥ tuʹmmstõʹǩǩe
parlameeʹnt miâsttmõõžž.
Ǩii vuäǯǯ jiõnsted?
Vuäitak jiõnsted presideʹnttvaalin,
• jos leäk Lääʹddjânnam meerlaž da
• jos leäk teâuddam 18 eeʹǩǩed mââimõõzzâst 28.1.2024.
Ǩeän vuäitak jiõnsted?
Peällõõǥǥ da vaʹlljeemõhttõõzz
vueiʹtte šiõtteed võboršiiʹǩǩid presidenʹttvaaʹle.
Võboršeeʹǩǩ âlgg leeʹd šâddvuõđlaž Lääʹddjânnam meerlaž.
Presideʹnttvõboršeeʹǩǩ liâ võboršeʹǩǩen veeʹzz jânnmest,
di nääiʹt vuäitak jiõnsted koon võboršeeʹǩǩ täättas.
Juâkksast võboršeeʹǩǩest lij jiijjâs võboršeǩnââmres.
Võboršiiʹǩǩi nââmar liâ kuâsttjemnalla
jiõnstempaaiʹǩin da jiõnstemsââʹjest.
Vuäǯǯak võboršiiʹǩǩin teâđaid ouddmiârkkân
lõõstin, televisiost da interneeʹttest.
Jiõnnvuõiggâdvuõttiʹlmmtõs
Jõs tuʹst lij vuõiggâdvuõtt jiõnsted,
vuäǯǯak tõʹst jiijjad domoi ǩeeʹrj.
Ǩeeʹrjest liâ kueʹhtt jiiõnnvuõiggâdvuõttiʹlmmtõõzz.
Vuäǯǯak jiõnnvuõiggâdvuõttiʹlmmtõõzz liâdǥliʹžžen,
jõs leäk välddam Suomi.fi-kääzzkõõzz âânnmõʹšše.
Suomi.fi lij Digi- da meerteâttkonttâr kääzzkõs.
Vuäitak lookkâd tõʹst lââʹzz addrõõzzâst www.suomi.fi/viestit.
Vuäitak vaʹlljeed, jiõnstak-a vaalpeiʹvven avi ooudbeäʹlnn.
Jõs jiõnstak vaalpeiʹvven,
ǩiõčč jiõnstempäikkad jiõnnvuõiggâdvuõttiʹlmmtõõzzâst.
Jos jiõnstak ooudbeäʹlnn,
vuäitak jiõnsted koʹst täättas
ouddjiõnstempääiʹǩest.
Jiõnnvuõiggâdvuõttiʹlmmtõõzz mieʹldd lij loǥstõk
âʹlddvuuʹdi ouddjiõnstempaaiʹǩin.
Jiõnnvuõiggâdvuõttiʹlmmtõõzz ij taarbâž
väʹldded mieʹldd jiõnstempäikka.
Riʹjttai, što tuʹst lij identiteʹtt-tuõđštõs.
Dommjiõnstummuš
Jõs leäk puõccmen di jiõnstempäikka jååttmõš
leʹbe jiõnstummuš toʹben lij tuʹst čuuʹt vaiggâd,
vuäitak jiõnsted dommjiõnstummšest ooudbeäʹlnn.
Iʹlmmtõõđ dommjiõnstummša
jiijjad kååʹdd väʹlddvaal-luʹvddkådda
mââimõõzzâst 16.1.2024 čiâss 16 mõõneeʹst.
Teʹlfon-nââmar lij jiõnnvuõiggâdvuõttiʹlmmtõõzzâst.
Vuäitak kõõččâd väʹlddvaal-luʹvddkååʹddest lââʹssteâđaid
dommjiõnstummšest.
Jõs presideʹnttvaalin riâžžât nuuʹbb jiõnstummuš,
dommjiõnstummša iʹlmmtõõttmõš lij viõǥǥâst
še nuuʹbb jiõnstummšest.
Nääiʹt jiõnstak ooudbeäʹlnn
Vuäitak jiõnsted presideʹnttvaalin ooudbeäʹlnn
koʹst täättas ouddjiõnstempääiʹǩest.
Ouddjiõnstummuš Lääʹddjânnmest lij 17.–23.1.2024.
Ouddjiõnstummuš ålggjânnmin lij 17.–20.1.2024.
Jos presideʹnttvaalin riâžžât nuuʹbb jiõnstummuš,
vuäitak še tõʹst jiõnsted vaalpeiʹvven leʹbe ooudbeäʹlnn.
Nuuʹbb vaal ouddjiõnstummuš lij Lääʹddjânnmest 31.1.–6.2.2024.
Nuuʹbb vaal ouddjiõnstummuš lij ålggjânnmin 31.1.–6.2.2024.
Vääʹld jiõnstummša mieʹldd snimldõõǥǥ õõʹnni identiteʹtt-tuõđštõõzz,
ouddmiârkkân paass, persoonkoort leʹbe vuejjamkoort.
Tååim nääiʹt ouddjiõnstempääiʹǩest:
1. Čuäʹjet identiteʹtt-tuõđštõõzz vaalveʹrǧǧnekka.
Veʹrǧǧneǩ tääʹrǩast tõn da oudd tuʹnne jiõnstemliipp.
2. Mõõn jiõnstemsâjja.
Ǩeeʹrjet jiõnstemliʹppe čiõlggsânji
tõn võboršeeʹǩǩ nââmar, ǩeän jiõnstak.
Jeäʹl ǩeeʹrjet jiõnstemliʹppe ni mâid jeeʹres.
Võboršiiʹǩǩi nââmrid vuäinak võboršeǩloǥstõõǥǥâst,
kååʹtt lij jiõnstemsââʹj seeiʹnest.
3. Piij mäccad jiõnstemliipp kõõskâst nuʹt,
što ij ni ǩii vueiʹt vueiʹnned nââmar.
4. Määʹcc vaalveʹrǧǧneeʹǩǩ årra.
Son leiʹmmai jiõnstemliiʹpp
da oudd tuʹnne ruʹčǩǩes vaalkonfeârt.
5. Piij leiʹmmjum jiõnstemliipp konfeâʹrtte
da liʹjmme konfeârt ǩidd.
6. Vaalveʹrǧǧneǩ räukk, što vuâllaǩeeʹrjtak lomaakk.
Vuâllaǩeeʹrjtõõzzin ååsktak,
što leäk jiõčč tiuddääm jiõnstemliipp,
vuäǯǯam tõõzz leeiʹm da kättam tõn konfeâʹrtte.
7. Looppâst veʹrǧǧneǩ peejj ruʹčǩǩes konfeârt da
lomaakk viʹsǩǩes vuõltteemkonfeâʹrtte.
Veʹrǧǧneǩ liʹjmmai viʹsǩǩes konfeârt ǩidd.
Vuõlttõs tååimted
dommkååʹdd väʹlddvaal-luʹvddkådda.
Nääiʹt jiõnstak vaalpeiʹvven
Vaalpeiʹvv lij pâʹsspeiʹvv 28.1.2024.
Vueiʹtlva nuuʹbb vaal vaalpeiʹvv lij pâʹsspeiʹvv 11.2.2024.
Vaalpeiʹvven jiõnstempääiʹǩ liâ äävai čiâss 9–20.
Vuäitak jiõnsted tåʹlǩ tõn jiõnstempääiʹǩest,
kååʹtt lååkk tuu jiõnnvuõiggâdvuõttiʹlmmtõõzzâst.
Vääʹld jiõnstummša mieʹldd snimldõõǥǥ õõʹnni identiteʹtt-tuõđštõõzz,
ouddmiârkkân paass, persoonkoort leʹbe vuejjamkoort.
Tååim nääiʹt jiõnstempääiʹǩest:
1. Čuäʹjet identiteʹtt-tuõđštõõzz vaalveʹrǧǧnekka.
Veʹrǧǧneǩ tääʹrǩast tõn, ååcc nõõmad vaal-loǥstõõǥǥâst
da oudd tuʹnne jiõnstemliipp.
2. Mõõn jiõnstemsâjja.
Ǩeeʹrjet jiõnstemliʹppe čiõlggsânji
võboršeeʹǩǩ nââmar, ǩeän jiõnstak.
Jeäʹl ǩeeʹrjet jiõnstemliʹppe ni mâid jeeʹres.
Võboršiiʹǩǩi nââmrid vuäinak võboršeǩloǥstõõǥǥâst,
kååʹtt lij jiõnstemsââʹj seeiʹnest.
3. Piij mäccad jiõnstemliipp kõõskâst nuʹt, što ij ni ǩii vueiʹt vueiʹnned nââmar.
4. Määʹcc vaalveʹrǧǧneeʹǩǩ årra.
Son leiʹmmai jiõnstemliipp.
5. Kõõččât leiʹmmjum jiõnstemliipp vaalčokka.
Ǩeäʹst vuäǯǯak vieʹǩǩ?
Vaalveʹrǧǧneeʹǩǩ vuäʹpste da vieʹǩǩte tuu jiõnstempääiʹǩest.
Jiõnstempääiʹǩest lij še vaalvieʹǩǩteeʹjj.
Vuäitak raukkâd suu veäʹǩǩen jiõnstemsâjja,
jos jiõk jiõčč pââʹst ǩeeʹrjted
võboršeeʹǩǩ nââmar jiõnstemliʹppe.
Vaalvieʹǩǩteeʹjen vuäitt leeʹd še ooumaž,
koon leäk jiõčč vaʹlljääm.
Son vuäitt leeʹd ouddmiârkkân ruått leʹbe âʹlddooumaž.
Vaalvieʹǩǩteeʹjj ij vuäǯǯ kuuitâǥ
leeʹd võboršeǩ leʹbe võboršeeʹǩǩ âʹlddooumaž.
Vaalvieʹǩǩteeʹjj ij vuäǯǯ särnnad ni ǩeäzz,
ǩeän jiõnstiǩ.
Vaalkäittmõš
Juâkksaž tuʹmmad jiõčč,
haaʹlad-a jiõnsted da ǩeän jiõnast.
Vaalkäittmõš miârkat tõn,
što tuʹst ij taarbâž särnnad ni ǩeäzz, ǩeän jiõnstak.
Vaalkäittmõõžž diõtt
teâudak jiõnstemliipp jiõnstemsââʹjest.
Jiõnâst presideʹnttvaalin! Nääiʹt vaaiktak tõõzz,
ǩii håidd presideeʹnt tuâjaid puõʹtti kutt eeʹjj.
Tän brosyyrâst čiõlǥtet čiõlggǩiõlin
jiõnstummšest da presideʹnttvaalin 2024.
Lââʹzz teâđaid kaaunak addrõõzzâst: www.vaalit.fi
Vuäitak kõõččâd vaalin da jiõnstummšest
še vuõiggâdvuõttministeria kääzzkõsnââmrest
0800 9 4770.
Vuäitak vuõltteed kõõččmõõžžad še WhatsApp-saaǥǥin
nââmra 050 438 8730.