Kåʹddvaal

Lääʹddjânnam jueʹjjet kooʹddid, koin lij vuâđđlääʹjj mieʹldd jiõččvaaldâšm. Kåʹddvaalin jiõnstet kåʹddväʹlddõsniiʹǩǩid, kook tuʹmmee määŋgain kååʹdd aaʹššin. 

Kåʹddväʹlddõõzz tuâj

Väʹlddõs vaʹsttad kååʹdd tällõõzzâst da toiʹmmjummšest di âânn kååʹdd pââimõs tuʹmmeemvääʹld. Tõt mieʹrrad, mõõk toiʹmmorgaan kååʹddest lie di mõõn nalla toiʹmmvääʹld da tuâjaid jueʹjjet oskkum oummui da veʹrǧǧniiʹǩǩi kõõsk. 

Kååʹddest vaʹlljeemnalla åårrai väʹlddõsniiʹǩǩi lååkkmeäʹrest meäʹrrad väʹlddõs. Väʹlddõõzzâst lij takai toiʹmmväʹldd tuʹmmeed kååʹdd jälsteeʹji õhttsaž aaʹššin. 

Jiõnstummuš kåʹddvaalin

Kåʹddvaalid tooiʹmtet juõʹǩǩ neelljad eeʹjj njuhččmannu kuälmad pâʹsspeeiʹv õhttna vuʹvddvaalivuiʹm. Jos njuhččmannu kuälmad pâʹsspeiʹvv teivv eʹjjpeivva leʹbe pâʹsspeivva mâŋŋa eʹjjpeeiʹv, vaalpeiʹvven lij pâʹsspeiʹvv õuʹddel eʹjjpeeiʹv.

Oummust, kååʹtt teâudd mââimõõzzâst vaalpeiʹvven 18 eeʹǩǩed, lij jiõnnvuõiggâdvuõtt kåʹddvaalin jiijjâs dommkååʹddest. Jeeʹres jânnmi meerla vuäiʹtte še jiõnsted kåʹddvaalin tiõttum määinaivuiʹm. Looǥǥ jeeʹres jânnmi meerlai jiõnstummšest lââʹzz lääʹddǩiõllsaž seeidast.

Tiuddâkksaž ooumaž vuäitt äʹlǧǧed võboršeʹǩǩen kåʹddvaalin tõn kååʹddest, kååʹtt lij suu dommkåʹdden 32. peeiʹv õuʹddel vaalpeeiʹv.