Kieldâvaaljah

Suomâ juáhhoo kieldáid, main lii vuáđulaavâ mield jiešhaldâšem. Kieldâvaaljâin jienâsteh kieldâ váldustiivrâ jesânijd, kiäh merideh maaŋgâin kieldâ aašijn. 

Kieldâ váldustiivrâ pargoh

Váldustivrâ västid kieldâ ekonomiast já tooimâst sehe kiävttá kieldâ alemuu meridemvääldi. Tot meerrid, ete moh toimâorgaaneh kieldâst láá sehe maht toimâväldi já pargoh juáhhojeh luáttámušulmui já virgehaldâšeijei kooskâ. 

Kieldâst valjimnáál airâsij lohomeereest meerrid váldustivrâ. Váldustiivrâst lii almos toimâväldi meridiđ kieldâ ässei ohtsijn aašijn. 

Jienâstem kieldâvaaljâin

Kieldâvaaljah toimâttuvvojeh jyehi niäljád ive cuáŋuimáánu kuálmád pasepeeivi siämmáá-áigásávt kuávluvaljâiguin. Jis cuáŋuimáánu kuálmád pasepeivi lii pessijâšpeivi tâi pessijâšpeeivi maŋasâš pasepeivi, te valjâpeivi lii pessijáid ovdedeijee pasepeivi.

Ulmust, kote tiävdá majemustáá valjâpeeivi 18 ihheed, lii jienâvuoigâdvuotâ kieldâvaaljâin jieijâs päikkikieldâst. Meid eres staatâi aalmugjesâneh pyehtih jienâstiđ kieldâvaaljâin tiätuiävtuiguin. Luuvâ eres staatâi aalmugjesânij jienâstmist lase suomâkielâlijn siijđoin.

Olesahasâš olmooš puáhtá asâttuđ iävtukkâssân kieldâvaaljâin ton kieldâst, mii lii suu päikkikieldâ 32. peeivi ovdil valjâpeeivi.