EU-vaaljah 2024
Euroop union aalmugjesâneh väljejeh
Euroop parlament jesânijd
valjâiguin viiđâ ive kooskâi.
Suomâst väljejuvvojeh
Euroop parlamentân
15 jesânid ađai meppid.
EU-vaaljah ađai europarlamentvaaljah uárnejuvvojeh
puoh Euroop union jeessânstaatâin
siämmáá ääigi.
Euroop unionist láá 27 jeessânstaatâd.
Ive 2024 EU-vaaljâi äigitavlu Suomâst lii:
- Valjâpeivi lii pasepeivi 9.6.2024.
- Munejienâstem päikkienâmist lii 29.5.–4.6.2024.
- Munejienâstem olgoenâmijn lii 29.5.–1.6.2024.
Euroop parlament pargoh
Euroop parlament lii
Euroop union aalmugovdâstemlájádâs.
Euroop parlament aasât laavâid
oovtâst Euroop union rađđijn.
Rääđi oovtâst
Euroop union jeessânstaatâid.
Euroop parlament tuhhit
Euroop union budjet
oovtâst rađđijn.
Euroop parlament kocá
komissio já Euroop union virgáduvâid.
Kii uážžu jienâstiđ?
Tun puávtáh jienâstiđ EU-vaaljâin, jis
- tun lah tiävdám 18 ihheed majemustáá 9.6.2024 já
- tun lah Suomâ aalmugjeessân tâi
- tun lah Euroop union jeessânstaatâ aalmugjeessân já tun lah almottâttâm jienâvuoigâdvuotâregisterân Suomâst majemustáá 21.3.2024.
Kiäm tun puávtáh jienâstiđ?
Piäláduvah já väljejeijeeseervih pyehtih asâttiđ
iävtukkâsâid EU-valjáid.
Iävtukkâs kalga leđe jienâvuoigâdvuođâlâš Suomâ aalmugjeessân tâi
Suomâ jienâvuoigâdvuotâregisterân valdum
Euroop union jeessânstaatâ aalmugjeessân.
EU-vaaljâi iävtukkâsah
láá iävtukkâssân oles enâmist,
te tun puávtáh jienâstiđ mon peri iävtukkâs.
Jyehi iävtukkâsâst lii jieijâs iävtukkâsnummeer.
Iävtukkâsâi numereh láá uáinimnáál
riehtiministeriö puáđuspalvâlusâst,
jienâstemsoojijn já jienâstemkoopijn.
Tun finniih iävtukkâsâin tiäđu ovdâmerkkân
loostâin, televisiost já internetist.
Jienâvuoigâdvuotâalmottâs
Jis tust lii vuoigâdvuotâ jienâstiđ,
te tun finniih tast pááikán reeivâ.
Tun finniih jienâvuoigâdvuotâalmottâs tuš šleđgâlâžžân,
jis tun lah váldám anon Suomi.fi-palvâlus.
Suomi.fi lii Digi- já aalmugtiätuvirgáduv palvâlus.
Tun puávtáh luuhâđ tast lase čujottâsâst www.suomi.fi/viestit
Tun puávtáh valjiđ,
jienâstah-uv valjâpeeivi vâi muuneeld.
Jis tun jienâstah valjâpeeivi,
te keejâ jieijâd jienâstemsaje jienâvuoigâdvuotâalmottâsâst.
Jis tun jienâstah muuneeld,
te tun puávtáh jienâstiđ mon peri
munejienâstemsaajeest.
Jienâvuoigâdvuotâalmottâs mieldi lii luvâttâllâm
tuu aldakuávlu munejienâstemsoojijn.
Vääldi persovntuođâštus fáárun jienâstemsajan.
Jienâvuoigâdvuotâalmottâs ij taarbâš väldiđ fáárun jienâstemsajan.
Päikkijienâstem
Jis tuu naavcah lihâdiđ tâi toimâđ láá tommittáá raijâšum,
ete tunjin lii merettes vaigâd
moonnâđ jienâstemsajan já jienâstiđ tobbeen,
te tun puávtáh jienâstiđ muuneeld pääihist.
Almottât päikkijienâstmân
jieijâd kieldâ kuávdášvaljâlävdikoodán
majemustáá 28.5.2024 tijme 16 räi.
Puhelinnummeer lii jienâvuoigâdvuotâalmottâsâst.
Tun puávtáh koijâdiđ kuávdášvaljâlävdikoddeest
lasetiäđuid päikkijienâstmist.
Návt tun jienâstah muuneeld
Tun puávtáh jienâstiđ EU-vaaljâin muuneeld
mon peri munejienâstemsaajeest.
Munejienâstem Suomâst lii 29.5.–4.6.2024.
Munejienâstem olgoenâmijn lii 29.5.–1.6.2024.
Vääldi jienâstemsajan fáárun koválii persovntuođâštus,
ovdâmerkkân passâ, persovnkorttâ tâi vyeijimkorttâ.
Tooimâ návt munejienâstemsaajeest:
- Čääiti persovntuođâštus valjâvirgeulmui. Virgeolmooš addel tunjin jienâstemliipu.
- Moonâ jienâstemkoopin. Čääli jienâstemliipun čielgâsávt ton iävtukkâs nummeer, kiäm tun jienâstah. Ele čääli jienâstemliipun maiden muide. Iävtukkâsâi numerijd tun uáináh iävtukkâsluvâttâlmist, mii lii jienâstemkoopi seeinist.
- Maacâst jienâstemliipu kaskoo tienuuvt, ete kihheen ij pyevti uáiniđ nummeer.
- Maacâ valjâvirgeulmuu luus. Sun stemppâlist jienâstemliipu já addel tunjin ruškis kooveert.
- Piejâ stemppâlistum jienâstemliipu kovertân já lijmii kooveert kiddâ.
- Valjâvirgeolmooš táttu, ete tun vuáláčáláh luámáttuv. Vuáláčalluin tun tähidah, ete tun lah jieš tiävdám jienâstemliipu, finnim toos stemppâl já toppim tom kovertân.
- Loopâst virgeolmooš piäjá ruškis kooveert já luámáttuv fiskis kovertân. Virgeolmooš lijmee fiskis kooveert kiddâ. Vuolgâttâs toimâttuvvoo tuu päikkikieldâ kuávdášvaljâlävdikoodán.
Návt tun jienâstah valjâpeeivi
Valjâpeivi lii pasepeivi 9.6.2024.
Valjâpeeivi jienâstemsajeh láá áávus tijme 9-20.
Tun puávtáh jienâstiđ tuš ton jienâstemsaajeest,
mii lohá tuu jienâvuoigâdvuotâalmottâsâst.
Vääldi jienâstemsajan fáárun koválii persovntuođâštus,
ovdâmerkkân passâ, persovnkorttâ tâi vyeijimkorttâ.
Tooimâ návt jienâstemsaajeest:
- Čääiti persovntuođâštus valjâvirgeulmui. Virgeolmooš ocá tuu noomâ valjâluvâttâlmist já addel tunjin jienâstemliipu.
- Moonâ jienâstemkoopin. Čääli jienâstemliipun čielgâsávt ton iävtukkâs nummeer, kiäm tun jienâstah. Ele čääli jienâstemliipun maiden muide. Iävtukkâsâi numerijd tun uáináh iävtukkâsluvâttâlmist, mii lii jienâstemkoopi seeinist.
- Maacâst jienâstemliipu kaskoo tienuuvt, ete kihheen ij pyevti uáiniđ nummeer.
- Maacâ valjâvirgeulmuu luus. Sun stemppâlist jienâstemliipu.
- Kooččât tuu stemppâlistum jienâstemliipu valjâuurnán.
Kiäst tun finniih iše?
Valjâvirgeulmuuh rävvejeh já išedeh tuu
jienâstemsaajeest.
Jienâstemsaajeest lii meid valjâišedeijee.
Tun puávtáh táttuđ suu išán jienâstemkoopin,
jis tun jieh jieš paste čäälliđ
iävtukkâs nummeer jienâstemliipun.
Valjâišedeijen puáhtá toimâđ meid olmooš,
kiäm tun lah jieš valjim.
Sun puáhtá leđe ovdâmerkkân omâhâš tâi aldaolmooš.
Valjâišedeijee ij uážu kuittâg
leđe iävtukkâs tâi iävtukkâs aldaolmooš.
Valjâišedeijee ij uážu muštâliđ kiässán,
ete kiäm tun jienâstih.
Valjâsyeligâsvuotâ
Juáháš meerrid jieš,
haalijd-uv sun jienâstiđ já kiäm jienâst.
Valjâsyeligâsvuotâ uáivild tom,
ete tun jieh taarbâš muštâliđ kiässán,
kiäm tun jienâstah.
Valjâsyeligâsvuođâ tiet
tun tiävdáh jienâstemliipu jienâstemkoopist.
Jienâst EU-vaaljâin!
Návt tun vaikuttah toos, kiäh ovdâsteh Suomâ
Euroop parlamentist čuávuváid vittâ ive.
Taan tieđettemčálusist muštâluvvoo čielgâ anarâškielân
jienâstmist já EU-vaaljâin 2024.
Luuvâ lase čujottâsâin:
vaalit.fi
elections.europa.eu/fi
selkokeskus.fi
Tun puávtáh koijâdiđ vaaljâin já jienâstmist
meid riehtiministeriö palvâlemnumerist
0800 9 4770.
Tun puávtáh vuolgâttiđ koččâmušâid meid WhatsApp-viestáin
numerân 050 438 8730