EU-vaal 2024

9.4.2024 15.54

Euroopp Unioon meerla vaʹlljee  
Euroopp parlameeʹnt vuäzzlaid  
vaalivuiʹm viiđ eeʹjj kõõski. 

Lääʹddjânnmest vaʹlljeet  
Euroopp parlamentta  
15 vuäzzliʹžžed leʹbe meʹpped. 

EU-vaalid leʹbe europarlameʹnttvaalid jäʹrjstet 
pukin Euroopp Unioon vuäzzlažjânnmin 
seämma ääiʹj. 
Euroopp Unioonâst lie 27 vuäzzlažjânnmed. 

Eeʹjj 2024 EU-vaali äiʹǧǧtaull Lääʹddjânnmest lij:   

  • Vaalpeiʹvv lij pâʹsspeiʹvv 9.6.2024. 
  • Õuddjiõnstummuš dommjânnmest lij 29.5.–4.6.2024. 
  • Õuddjiõnstummuš ålggjânnmin 29.5.–1.6.2024. 

Euroopp parlameeʹnt tuâj 

Euroopan parlameʹntt lij 
Euroopp Unioon meereeʹttkâʹsttemstrooiʹtel. 

Euroopp parlameʹntt šiõttâd laaʹjjid 
õõutsââʹjest Euroopp Unioon suåvtõõzzin. 
Suåvtõs eeʹttkâstt 
Euroopp Unioon vuäzzlažriikkid. 

Euroopp parlameʹntt preemm 
Euroopp Unioon tällõsarvvlõõzz 
õõutsââʹjest suåvtõõzzin. 

Euroopp parlameʹntt vuåpp  
komissio da Euroopp Unioon veʹrǧǧkonttrid. 

Ǩii vuäǯǯ jiõnsted? 

 

Vuäitak jiõnsted EU-vaalin, jos 

  • leäk teâuddam 18 eeʹǩǩed mââimõsân 9.6.2024 da 
  • leäk Lääʹddjânnam meerlaž da 
  • leäk Euroopp Unioon vuäzzlažriikk meerlaž da leäk iʹlmmtõõttâm jiõnnvuõiggâdvuõttrekisteera Lääʹddjânnmest mââimõõzzâst 21.3.2024. 

Ǩeän vuäitak jiõnsted? 

Peällõõǥǥ da vaʹlljeeiõhttõõzz vuäiʹtte šiõtteed 
võboršiiʹǩǩid EU-vaalid. 
Võboršeǩ âlgg leeʹd jiõnnvuõiggâdvuõttneǩ Lääʹddjânnam meerlaž leʹbe 
Lääʹddjânnam jiõnnvuõiggâdvuõttrekisteera valddum 
leäk Euroopp Unioon vuäzzlažriikk meerlaž. 

EU-vaali võboršeeʹǩǩ  
lie võboršeʹǩǩen veezz jânnam, 
nuʹtt vuäitak jiõnsted ǩeän täättak võboršeeʹǩǩ. 

Juõʹǩǩ võboršeeʹǩǩest lij jiiʹjjes võboršeǩnââmar. 
Võboršiiʹǩǩi nââmar kuâsttje 
vuõiggâdvuõttministeria puåđõskääzzkõõzzâst, 
jiõnstempaaiʹǩin da jiõnstemsõõʹjin.  

Vuäǯǯak teâđ võboršiiʹǩǩi pirr õuddmiârkkân  
lõõstin, televisiost da interneeʹttest. 

Jiõnnvuõiggâdvuõttiʹlmmtõs 

Jos tuʹst lij vuõiggâdvuõtt jiõnsted, 
vuäǯǯak tõʹst ǩeeʹrj päikksad.  

Vuäǯǯak jiõnnvuõiggâdvuõttiʹlmmtõõzz tåʹlǩ liâdglaž häämast,  
jos leäk välddam ââʹnnma Suomi.fi-kääzzkõõzz.  
Suomi.fi lij Digi- da meerteâttkonttâr kääzzkõs. 
Vuäitak lookkâd tõʹst lââʹzz addrõõzzâst www.suomi.fi/viestit 

Vuäitak vaʹlljeed, 
jiõnstak-a vaalpeiʹvven avi õuddǩiõʹtte. 
Nääiʹt jiõnstak vaalpeiʹvven 
ǩiõčč jiõnstempäikkad jiõnnvuõiggâdvuõttiʹlmmtõõzzâst. 

Nääiʹt jiõnstak õuddǩiõʹtte 

 Vuäitak jiõnsted koon täättas  
õuddjiõnstempääiʹǩest. 
Jiõnnvuõiggâdvuõttiʹlmmtõõzz mieʹldd lij loǥstõk  
tuu âʹlddvuuʹd õuddjiõnstempaaiʹǩin. 

Vääʹld persoontuõđštõõzz mieʹldd jiõnstempäikka. 
Jiõnnvuõiggâdvuõttiʹlmmtõõzz ij taarbaš väʹldded mieʹldd 
jiõnstempäikka. 

Pääiʹǩest jiõnstummuš 

Jos tuʹst oodd liikkeed leʹbe toiʹmmjed lij nuʹtt rajjtõõvvâm,  
što tuʹnne lij samai väivv 
mõõnnâd jiõnstempäikka da jiõnsted toʹben,  
vuäitak jiõnsted õuddǩiõʹtte pääiʹǩstad. 

Iʹlmmtõõđ päiʹǩǩjiõnstummša  
jiijjad kååʹdd väʹlddvaal-luʹvddkådda  
mââimõõzzâst 28.5.2024 čiâss 16 räjja mõõneeʹst.  
Teʹlfoon-nââmar lij jiõnnvuõiggâdvuõttiʹlmmtõõzzâst.  
Vuäitak kõõččâd väʹlddvaal-luʹvddkååʹddest  
lââʹssteâđaid pääiʹǩest jiõnstem diõtt.  

Nääiʹt jiõnstak õuddǩiõʹtte 

Vuäitak jiõnsted EU-vaalin õuddǩiõʹtte 
koon täättas õuddjiõnstempääiʹǩest.  

Õuddjiõnstummuš Lääʹddjânnmest lij 29.5.–4.6.2024. 
Õuddjiõnstummuš ålggjânnmin lij 29.5.–1.6.2024. 


Vääʹld jiõnstempäikka mieʹldd koovlaž persoontuõđštõõzz,  
õuddmiârkkân paass, persoonkoort leʹbe vuejjamkoort. 

Tueʹjjed nääiʹt õuddjiõnstempääiʹǩest: 

 

  1. Čuäʹjet persoontuõđštõõzz vaalveʹrǧǧnekka. Veʹrǧǧneǩ oudd tuʹnne jiõnstemliipp. 
  2. Mõõn jiõnstemsâjja. Ǩeeʹrjet jiõnstemliʹppe čiõlggsânji tõn võboršeeʹǩǩ nââmar, koon jiõnstak. Jeäʹl ǩeeʹrjet jiõnstemliʹppe ni mõõn jeeʹrab. Võboršiiʹǩǩi nââmrid vuäinak võboršeǩloǥstõõǥǥâst, kååʹtt lij jiõnstemsââʹj seeiʹnest.  
  3. Piij jiõnstemliipp kõõskâst mäccat nuʹt, što ij ni ǩii vueiʹt vueiʹnned nââmar. 
  4. Määʹʒʒ vaalveʹrǧǧneeʹǩǩ årra. Son leiʹmmai jiõnstemliipp da õudd tuʹnne ruʹčǩǩes ǩeʹrjjkuõr.
  5. Piij jiõnstemliipp ǩeʹrjjkuõr sizz da liʹjmme ǩeʹrjjkuõr ǩidd. 
  6. Vaalveʹrǧǧneǩ räukk, što vuâllaǩeeʹrjtak lomaakk. Vuâllaǩeeʹrjtõõzzin  ååsktak, što leäk jiõčč teâuddam jiõnstemliipp, vuäǯǯam tõõzz leeiʹm da piijjâm tõn kuõr sizz.  
  7. Looppâst veʹrǧǧneǩ peejj ruʹčǩǩes ǩeʹrjjkuõr da lomaakk viʹsǩǩes ǩeʹrjjkuõr sizz. Veʹrǧǧneǩ liʹjmmai viʹsǩǩes ǩeʹrjjkuõr ǩidd. Vuõlttõõzz tooiʹmtet tuu dommkååʹdd väʹlddvaal-luʹvddkådda. 

Nääiʹt jiõnstak vaalpeiʹvven 

Vaalpeiʹvv lij pâʹsspeiʹvv 9.6.2024. 

Vaalpeeiʹv jiõnstempääiʹǩ lie äävai čiâss 9–20. 

Vuäitak jiõnsted tåʹlǩ tõn jiõnstempääiʹǩest,  
kååʹtt lååkk tuu jiõnnvuõiggâdvuõttiʹlmmtõõzzâst. 

Vääʹld jiõnstempäikka mieʹldd koovlaž persoontuõđštõõzz,  
õuddmiârkkân paass, persoonkoort leʹbe vuejjamkoort. 

Tueʹjjed nääiʹt jiõnstempääiʹǩest:  

  1. Čuäʹjet persoontuõđštõõzz vaalveʹrǧǧnekka. Veʹrǧǧneǩ ååcc tuu nõõm vaal-loǥstõõǥǥâst da oudd tuʹnne jiõnstemliipp.  
  2. Mõõn jiõnstemsâjja. Ǩeeʹrjet jiõnstemliʹppe čiõlggsânji tõn võboršeeʹǩǩ nââmar, koon jiõnstak. Jeäʹl ǩeeʹrjet jiõnstemliʹppe ni mõõn jeeʹrab. Võboršiiʹǩǩi nââmrid vuäinak võboršeǩloǥstõõǥǥâst, kååʹtt lij jiõnstemsââʹj seeiʹnest. 
  3. Piij jiõnstemliipp kõõskâst mäccat nuʹt, što ij ni ǩii vueiʹt vueiʹnned nââmar. 
  4. Määʹʒʒ vaalveʹrǧǧneeʹǩǩ årra. Son leiʹmmai jiõnstemliipp. 
  5. Kõõččât leiʹmmjum jiõnstemliipp vaalčokka. 

Ǩeäʹst vuäǯǯak vieʹǩǩ? 

Vaalveʹrǧǧneeʹǩǩ vuäʹpste da vieʹǩǩte tuu  
jiõnstempääiʹǩest. 

Jiõnstempääiʹǩest lij še vaalvieʹǩǩteei.  
Vuäitak raukkâd suu vieʹǩǩen jiõnstemsâjja,  
jos jiõk jiõčč pââʹst ǩeeʹrjted  
võboršeeʹǩǩ nââmar jiõnstemliʹppe. 

Vaalvieʹǩǩteeʹjen vuäitt še toiʹmmjed ooumaž,  
koon leäk jiõčč vaʹlljääm.   
Son vuäitt leeʹd õuddmiârkkân ruått leʹbe õõldâs ooumaž.  
Vaalvieʹǩǩteeʹjen ij vuäǯǯ kuuitâǥ  
leeʹd võboršeǩ leʹbe võboršeeʹǩǩ õõldâs ooumaž. 

Vaalvieʹǩǩteei ij vuäǯǯ särnnad ni ǩeäzz,  
ǩeän jiõnsteǩ. 

Vaalkäittmõš 

Juõʹǩǩkaž meäʹrrad jiõčč,  
haaʹlad-a jiõnsted da ǩeän jiõnast. 

Vaalkäittmõš miârkkšââvv tõn,  
što tuʹst ij taarbaš särnnad ni ǩeäzz,  
ǩeän jiõnsteǩ.  

Vaalkäittmõõžž diõtt  
teâudak jiõnstemliipp jiõnstemsââʹjest. 

Jiõnâst EU-vaalin! 
Nääiʹt vaaiktak tõõzz, ǩeäk eeʹttkâʹstte Lääʹddjânnam  
Euroopp parlameeʹntest pueʹtti vitt eeʹjj. 

Tän brosyyrâst vuäʹpstet čiõlggǩiõʹlle 
jiõnstummšest da EU-vaalin 2024.  

Looǥǥ lââʹzz addrõõzzin: 
vaalit.fi  
elections.europa.eu/fi  
selkokeskus.fi  

Vuäitak še kõõččâd vaalin da jiõnstummšest  
vuõiggâdvuõttministeria kääzzkõsnââmrest  
0800 9 4770. 

Vuäitak še vuõltteed kõõččmõõžž WhatsApp-saaǥǥin  
nââmra 050 438 8730