Dieđut presideanttaválggas ja jienasteamis
Suoma riikkavuložat válljejit presideantta válgga guđa jagi gaskkaid.
Presideanttaválggas sáhttet leat guokte jienasteami.
Juos okta evttohasain oažžu vuosttaš jienasteamis
eanet go beali addojuvvon jienain,
son válljejuvvo njuolga presideantan.
Presideanttaválggas ordnejuvvo nubbi jienasteapmi,
juos giige evttohasain ii oaččo
vuosttaš jienasteamis badjel beali jienain.
Nubbi jienasteapmi ordnejuvvo
dan guovtti evttohasa gaskkas,
geat oaččuiga vuosttaš jienasteamis eanemus jienaid.
Vuosttaš jienasteapmi:
Válgabeaivi lea sotnabeaivi 28.1.2024.
Ovdajienasteapmi lea Suomas 17.–23.1.2024.
Ovdajienasteapmi olgoriikkain lea 17.–20.1.2024.
Vejolaš nubbi jienasteapmi:
Válgabeaivi lea sotnabeaivi 11.2.2024.
Ovdajienasteapmi lea Suomas 31.1.–6.2.2024.
Ovdajienasteapmi olgoriikkain lea 31.1.–3.2.2024.
Presideantta barggut
Presideanta jođiha Suoma olgoriikkapolitihka
ovttasráđiid ráđđehusain.
Presideanta váfista lágaid,
maid riikkabeaivvit lea dohkkehan.
Presideanta nammada oaiveministara
ja eará ministariid bargoseaset.
Dasa lassin son nammada duopmáriid ja
muhtin alla virgeolbmuid.
Son mearrida soađis ja ráfis.
Presideanta dárbbaša dattetge mearrádussii
riikkabeivviid miehtama.
Gii oažžu jienastit?
Don sáhtát jienastit presideanttaválggas,
• juos don leat Suoma riikkavuloš ja
• juos don leat deavdán 18 jagi maŋemusat 28.1.2024.
Gean don sáhtát jienastit?
Bellodagat ja válljenovttastusat
sáhttet ásahit evttohasaid presideanttaválgii.
Evttohas ferte leat Suoma eamiriikkavuloš.
Presideantaevttohasat leat evttohassan oba riikkas,
nu ahte sáhtát jienastit gean evttohasa beare.
Juohke evttohasa lea iežas evttohasnummár.
Evttohasaid nummárat leat ovdan
jienastanbáikkiin ja jienastanluokkuin.
Don oaččut dieđu evttohasain ovdamearkka dihte
aviissain, televišuvnnas ja interneahtas.
Jienastanvuoigatvuohtailmmuhus
Juos dus lea riekti jienastit,
oaččut das ruoktot reivve.
Reivves leat guokte jienastanriekteilmmuhusa.
Don oaččut jienastanriekteilmmuhusa elektrovnnalažžan,
juos don leat váldán Suomi.fi-bálvalusa atnui.
Suomi.fi lea Digi- ja álbmotdiehtovirgedoaimmahaga bálvalus.
Sáhtát lohkat das lasi čujuhusas www.suomi.fi/viestit.
Don sáhtát válljet, jienastatgo válgabeaivve vai ovddalgihtii.
Juos jienastat válgabeaivve,
geahča iežat jienastanbáikki jienastanriekteilmmuhusas.
Juos jienastat ovddalgihtii,
don sáhtát jienastit man beare ovdajienastanbáikkis.
Jienastanriekteilmmuhusas fárus lea logahallan
iežat lagasguovllu ovdajienastanbáikkiin.
Jienastanriekteilmmuhusa ii dárbbaš
váldit fárrui jienastanbáikái.
Nohkká lea, ahte dus lea identitehtaduođaštus.
Ruovttus jienasteapmi
Juos don leat buohcci dehe dutnje lea badjelmearálaš
váttis mannat jienastanbáikái ja jienastit doppe,
nu don sáhtát jienastit ovddalgihtii ruovttus.
Ilmmut iežat ruovttus jienasteapmái
iežat gieldda guovddášválgalávdegoddái
maŋemusat 16.1.2024 diibmu 16 rádjái.
Telefonnummár lea jienastanriekteilmmuhusas.
Don sáhtát jearrat guovddášválgalávdegottis lassidieđuid
ruovttus jienasteamis.
Juos presideantaválggas ordnejuvvo nuppi jienasteapmi,
ruovttus jienasteapmái iežat ilmmuheapmi lea vuoimmis
maid nuppi jienasteamis.
Ná jienastat ovddalgihtii
Don sáhtát jienastit presideanttaválggas ovddalgihtii
man beare ovdajienastanbáikkis.
Ovdajienasteapmi Suomas lea 17.–23.1.2024.
Ovdajienasteapmi olgoriikkain lea 17.–20.1.2024.
Juos presideanttaválggas ordnejuvvo nubbi jienasteapmi,
sáhtát donnai jienastit válgabeaivve dehe ovddalgihtii.
Nuppi válgga ovdajienasteapmi Suomas lea 31.1.–6.2.2024.
Nuppi válgga ovdajienasteapmi olgoriikkain lea 31.1.–3.2.2024.
Váldde jienasteapmái fárrui govalaš identitehtaduođaštusa,
ovdamearkka dihte pássa, persovdnagoartta dehe vuodjingoartta.
Bargga ná ovdajienastanbáikkis:
1. Čájet identitehtaduođaštusa válgavirgeolbmui.
Virgeolmmoš dárkkista dan ja addá dutnje jienastanlihpu.
2. Mana jienastanluggui.
Čále jienastanlihppui čielgasit
dan evttohasa nummára, gean jienastat.
Ale čále jienastanlihppui maidege eará.
Evttohasaid nummárat oainnát evttohaslogahallamis,
mii lea jienastanluokku seainnis.
3. Máhco jienastanlihpu gasku nu,
ahte giige ii sáhte oaidnit nummára.
4. Máhca válgavirgeolbmo lusa.
Son steampilastá jienastanlihpu
ja addá dutnje ruškes konfaluhta.
5. Cokka steampilaston jienastanlihpu konfaluhtii
ja liibme konfaluhta gitta.
6. Válgavirgeolmmoš bivdá, ahte don vuolláičálát skovi.
Vuolláičállosiin dáhkidat,
ahte don leat ieš deavdán jienastanlihpu,
ožžon dasa steampila ja gidden dan konfaluhttii.
7. Loahpas virgeolmmoš bidjá ruškes konfaluhta ja
skovi fiskes sáddenreivii.
Virgeolmmoš liibme fiskes konfaluhta gitta.
Sáddehus doaimmahuvvo
iežat ruovttugieldda guovddášválgalávdegoddái.
Ná jienastat válgabeaivve
Válgabeaivi lea sotnabeaivi 28.1.2024.
Vejolaš nuppi válgga válgabeaivi lea sotnabeaivi 11.2.2024.
Válgabeaivve jienastanbáikkit leat rabas diibmu 9–20.
Don sáhtát jienastit dušše dan jienastanbáikkis,
mii lohká iežat jienastanriekteilmmuhusas.
Váldde jienastussii mielde govalaš identitehtaduođaštusa,
ovdamearkka dihte pássa, persovdnagoartta dehe vuodjingoartta.
Bargga ná jienastanbáikkis:
1. Čájet identitehtaduođaštusa válgavirgeolbmui.
Virgeolmmoš dárkkista dan, ohcá du nama válgalogahallamis
ja addá dutnje jienastanlihpu.
2. Mana jienastanluggui.
Čále jienastanlihppui čielgasit
evttohasa nummára, gean jienastat.
Ale čále jienastanlihppui maidege eará.
Evttohasaid nummáriid oainnát evttohaslogahallamis,
mii lea jienastanluokku seainnis.
3. Máhco jienastanlihpu gasku nu, ahte giige ii sáhte oaidnit nummára.
4. Máhca válgavirgeolbmo lusa.
Son steampilastá jienastanlihpu.
5. Gahčat iežat steampilaston jienastanlihpu válgaurdnii.
Geas oaččut veahki?
Válgavirgeolbmot nevvot ja veahkehit du jienastanbáikkis.
Jienastanbáikkis lea maid válgaveahkki.
Sáhtát bivdit su veahkkin jienastanluggui,
juos it ieš bastte čállit
evttohasa nummára jienastanlihppui.
Válgaveahkkin sáhttá doaibmat maid olmmoš,
gean don leat ieš válljen.
Son sáhttá leat ovdamearkka dihte oapmahaš dehe lagaš.
Válgaveahkki ii oaččo goitge
leat evttohas dehe evttohasa lagaš.
Válgaveahkki ii oaččo muitalit geasage,
gean don jienastit.
Válgasuollemasvuohta
Juohkehaš mearrida ieš,
háliidago jienastit ja gean jienasta.
Válgasuollemasvuohta dárkkuha dan,
ahte don it dárbbaš muitalit geasage, gean jienastat.
Válgasuollemasvuođa dihte
deavddát jienastanlihpu jienastanluokkus.
Jienas presideanttaválggas! Ná váikkuhat dasa,
gii dikšu presideantta bargguid čuovvovaš guhtta jagi.
Dán dieđihančállosis muitaluvvo čielgagielain
jienasteamis ja presideanttaválggas 2024.
Lasi dieđu gávnnat čujuhusas: www.vaalit.fi
Sáhtát jearrat válggas ja jienasteamis
maid riekteministeriija bálvalannummáris
0800 9 4770.
Sáhtát sáddet iežat gažaldaga maid WhatsApp-dieđáhusain
nummárii 050 438 8730.