Guovlluválggaid ovdajienasteapmi álgá gaskavahku 12.1.

Vuoigatvuođaministeriija
Julkaisuajankohta 5.1.2022 10.11
Dieđáhus

Guovlluválggaid ovdajienasteapmi lea ruovtturiikkas 12.–18.1. ja olgoriikkain 12.-15.1. Aitosaš válgabeaivi lea sotnabeaivve 23.1.2022.

Ovdajienastanáigge sáhttá jienastit friddja gos beare almmolaš jienastanbáikkis, ruovtturiikkas dahje olgoriikkain. Válgabeaivve 23.1. ieš guhtege jienasta jienastanvuoigatvuođaalmmuhusas máinnašuvvon jienastanbáikkis.

Guovlluválggain leat ruovtturiikkas oktiibuot 900 almmolaš ovdajienastanbáikki. Ovdajienastanbáikkit leat eanaš gielddadáluin, girjerájuin dahje gávpeguovddážiin. Válgabeaivve jienastanbáikkit leat 1664. Dieđut ovdajienastanbáikkiin ja guovlluválgaevttohasain gávdnojit vaalit.fi-siidduin. Gielddat dieđihit jienastanbáikkiin maiddái ieža.

Olgoriikkain ovdajienastanáigi 12.-15.1. Ovdajienastanbáikkit leat olgoriikkain 70 sierra riikkain oktiibuot 94 doaibmabáikkis. Oassi ovdajienastanbáikkiin leat rabas dušše muhtun ovdajienastanbeaivve. Olgoriikkain lea vejolaš jienastit maiddái reivviin.

Helssetlaččat ja Ålándalaččat eai jienas guovlluválggain

Helssetlaččat eai jienas guovlluválggain, go Helssega sosiála- ja dearvvašvuođafuolahusas ja gádjundoaimmas vástida boahttevuođasge gávpot. Sosiála- ja dearvvašvuođafuolahusa ođastus ii guoskka maiddái Ålándda eanagotti.

Koronaepidemiijadilli váldojuvvo vuhtii válgaordnemiin

Guovlluválggat doaimmahuvvojit epidemiijadili gáibidan ordnemiin. Vuoigatvuođaministeriija ja Dearvvašvuođa ja buresveadjima lágádus (DBL) váldet guovlluválggain ordnemiin vuhtii epidemiijadili. DBL:a oainnu mielde jienasteapmi lea unnán riskka dilli.

Vuoigatvuođaministeriija ja DBL leat gárvvistan ovttasbarggus rávvagiid gielddaide válggaid dearvvasvuođadorvvolaš jienasteamis koronaáigge. Dárbbu mielde čuovvut báikkálaš dearvvašvuođavirgeoapmahaččaid addán dárkilut rávvagiid.
Vaalit.fi-siidduin leat jienasteaddjiide rávvagat dorvvolaš jienasteapmái koronaáigge. Ámadadjosuoji ja giehtadesinfiserendoidosa geavaheapmi lea dehálaš ja nu maiddái doarvái guhkes dorvogaskka seailluheapmi jienastettiin. Válgavirgeolbmot bearráigehččet dorvvolašvuođa jienastanbáikkis ja rávvejit rávvagiid čuovvumii. 

Vuoigŋanoalledávdamearkkaid vásihan olbmuid ja doaktára mearridan karanteanas dahje erremis lean jienasteaddjiid várás leat plánejuvvon sierradoaimmat jienasteami vejolažžan dahkamii. Jienasteaddjit sáhttet jearrat ráđi sierraordnemiin iežaset gieldda guovddášválgalávdegottis.

Jietnavuoigadahtton olbmot guovlluválggain

Olmmoš, guhte deavdá maŋimustá válgabeaivve 18 jagi, lea jietnavuoigadahtton  guovlluválggain iežas buresveadjinguovllus. Suoma riikkavuložiid lassin  jietnavuoigadahtton leat EU riikkaid sihke Islándda ja Norgga riikkavuložat, geain lea ruovttugiela Suomas buresveadjinguovllus. Eará olgoriikalaččat leat jietnavuoigadahtton, jus sis leamašan ruovttugielda Suomas unnimustá guovtti jagi áigge. 

Jietnavuoigadahtton olbmot leat ožžon Digi- ja álbmotdiehtodoaimmahagas poastta bokte almmuhusa jietnavuoigatvuođas. Jus jietnavuoigadahtton lea almmuhan vuostáiváldit virgeoapmahašdieđáhusaid elektrovnnalaččat, almmuhus lea sáddejuvvon Suomi.fi-bálvalussii.

Personvuođa duođatšapmi

Jienasteaddji galgá čájehit čielggadusa personvuođas. Dan sáhttá duođaštit áššegirjjiin mas lea govva, ovdamearkan vuodjinkoarttain, personkoarttain dahje pássain. Čielggadeapmin personvuođas sáhttá dohkkehuvvot maiddái ng. bábir vuodjinkoarta, jus válgavirgeolmmoš dovdá jienasteaddji das lean govas. Mihtilmas lea, ahte válgavirgeolmmoš sáhttá leat sihkkar jienasteaddji personvuođas. Jus jietnavuoigadahtton olbmos ii leat personvuođa čujuhan fámus lea áššegirji, son sáhttá oažžut boleslágádusas nuvttá, gaskaboddasaš personkoartta jienasteami várás. 

Jienasteaddji dovdáma várás válgavirgeolmmoš sáhttá bivdit jienasteaddji váldit ámadadjosuoji vehá áigái eret ámadaju ovddas. 

Čuovo jienastanealaskasvuođa neahtas

Vaalit.fi -sidduin sáhttá čuovvut ovdajienasteami ealaskasvuođa. Ovdajienastanáigge nehttii beaiváduvvo diimmu gaskka dieđut ovddalgihtii jienastan olbmuid mearis buresveadjinguovllus ja olles riikkas.

Lassedieđut: 
ráđđádalli virgeolmmoš Heini Huotarinen, t. 0295 150 127, [email protected]
sierraáššedovdi Laura Nurminen, t. 0295 150 008, [email protected]
válgahoavda Arto Jääskeläinen, t. 0295 150 128, [email protected]

Diehtu válggain ja jienasteamis
Koronarávvagat jienasteaddjiide guovlluválggain
DBL: Árvvoštallan dáhpáhusaid ja čoahkkanemiid koronavirusii laktásan riskkain
Guovlluválgaevttohasat neahtas 
Guovlluválggaid jienastanbáikkit
Rávvagat reivejienasteapmái
Lassedieđut buresveadjinguovllus
Gielddaid guovddášválgalávdegottit