Presideanttaválga sotnabeaivvi 28.1.2024
Presideanttaválga doaimmahuvvo sotnabeaivvi 28.1.2024. Válggas jienastanvuoiggalaš Suoma riikkavuložat válljejit dásseválddi presideantta guđa jagi guhkkosaš doaibmaáigodahkii. Evttohasat leat evttohassan oba riikkas.
Presideanttaválgga áigedávval
Presideanta válljejuvvo dárbbu mielde guovttemuttot válggas. Juos okta evttohasain oažžu vuosttaš válggas eanet go beali addojuvvon jienain, son válljejuvvo njuolga presideantan. Nubbi válga lágiduvvo, juos oktage evttohasain ii oaččo vuosttaš válggas badjel beali jienain. Vejolaš nubbi válga lágiduvvo guovtti eanemus jienaid ožžon evttohasa gaskkas.
Válgabeaivi lea sotnabeaivi 28.1.2024.
Ovdajienasteapmi lágiduvvo ruovttueatnamis 17.−23.1.2024 ja olgoriikkain 17.−20.1.2024.
Vejolaš nuppi válgga válgabeaivi lea sotnabeaivvi 11.2.2024.
Ovdajienasteapmi ordnejuvvo ruovttueatnamis 31.1.−6.2.2024 ja olgoriikkain 31.1.−3.2.2024.
Jienastanriekti juohke 18 jagi deavdán Suoma riikkavuložis
Boahtte válggain jienastanvuoiggalaččat leat orrunbáikkis sorjákeahttá buot Suoma riikkavuložat, geat leat dávdán 18 jagi maŋemusat 28.1.2024. Vejolaš nuppi válggas geavahuvvo seamma jienastanriekteregistara go vuosttaš válggas dehege jienastanvuoiggalaččat leat seammat.
Digi- ja álbmotdiehtovirgedoaimmahat lea sádden ilmmuhusa jienastanrievttis juogo reiven ruoktot dehe elektrovnnalaččat Suomi.fi-bálvalussii. Ilmmuhus sáddejuvvui elektrovnnalaččat daidda, geat leat diŋgon eiseváldedieđáhusaid Suomi.fi-bálvalussii.
Evttohasat
Helssega válgabiirelávdegoddi váfistii presideanttaválgga evttohasásaheami 21.12.2023. Evttohasat ja sin evttohasnummárat gávdnojit válggaid diehto- ja boađusbálvalusas.
Identiteahta duođašteapmi jienastanbáikkis
Jienasteaddji galgá čájehit čilgehusa iežas identiteahtas jienastanbáikkis. Identiteahta sáhttá duođaštit virggálaš govalaš áššegirjjiin, dego vuodjingoarttain dehe bolesa mieđihan persovdnagoarttain ja pássain.
Ovdajienasteapmi ruovttueatnamis ja olgoriikkain
Jienastanvuoiggalaš sáhttá jienastit ovddalgihtii man beare almmolaš ovdajienastanbáikkis ruovttueatnamis dehe olgoriikkain.
Ruovttueatnama ja olgoriikka ovdajienastanbáikkiid čujuhusat ja rabasáiggit gávdnojit válggaid diehto- ja boađusbálvalusas ja DÁV jienastanbáikebálvalusas www.aanestyspaikat.fi.
Ovdajienastanbáikkiid ja maid eará, mii laktása presideanttaválgii, sáhttá jearrat maid riekteministeriija nuvttá telefonbálvalusas:
- suomagielalaš bálvalus nummáris 0800 9 4770
- ruoŧagielalaš bálvalus nummáris 0800 9 4771
- WhatsApp-dieđáhusbálvalus nummáris 050 438 8730.
Olmmoš, gean nákca lihkadit ja doaibma lea dan mađe rádjahuvvan, ahte son ii beasa almmá badjelmearálaš váttisvuođaid haga jienastanbáikái, sáhttá jienastit ovddalgihtii ruovttustis. Ruovttus jienasteapmái galgá dieđihit iežas gieldda guovddášválgalávdegoddái maŋemusat disdaga/maŋŋebárgga 16.1.2024 ovdal diibmu 16.
Olgoriikkain oba ovdajienastanáigodaga ja válgabeaivvi orrut ja orodeaddjit sáhttet jienastit reivve bakte olgoriikkain. Jienastanvuoiggalaš, gii háliida jienastit reivve bakte, galgá diŋgot reivejienastanáššegirjjiid ovddalgihtii olgoriikkaide, daid oažžuma maŋŋel jienastit ja bostet iežas jiena Supmii iežas gieldda guovddášválgalávdegoddái. Reivejietna galgá leat mearrebáikkis rivttes guovddášválgalávdegottis maŋemusat bearjadaga 26.1. ovdal diibmu 19. Vejolaš nuppi válgga reivejietna galgá leat ollen mearrái maŋemusat bearjadaga 9.2.2024 ovdal diibmu 19. Dárkilit rávvagat gávdnojit čujuhusas www.vaalit.fi/kirjeaanestys.
Jienasteapmi válgabeaivvi ođđajagimánu 28. beaivvi
Válgabeaivvi visot jienastanbáikkit leat rabas diibmu 9–20. Válgabeaivvi beassá jienastit dušše jienastanriekteilmmuhussii merkejuvvon jienastanbáikkis. Iežas válgabeaivvi jienastanbáikki sáhttá ohcat maid čujuhusa vuođul DÁV jienastanbáikebálvalusas čujuhusas www.aanestyspaikat.fi.
Bohtosa rehkenastin
Ovdajienaid rehkenastin álggahuvvo juo válgabeaivvi jienasteami áigge. Válgabeaivvi jienaid álgorehkenastin álggahuvvo dakkaviđe go válgalanjadagat leat giddejuvvon. Álgodieđut, mat gusket rehkenastima, almmustuhttojuvvojit válgaeahkeda áigge diibmu 20 rájes, goas ovdajienaid rehkenastima boađus lea ulbmil leat válmmas. Válggaid álgobohtosat gárvánit eahkeda ja ija áigge.
Dárkkistanrehkenastin ollahuhttojuvvo válgabiirelávdegottiin válgabeaivvi čuovvovaš mánnodaga/vuossárgga 29.1. Helssega válgabiirelávdegoddi váfista evttohasaide oba riikkas addojuvvon jienaid lohkomearit disdaga/maŋŋebárgga 30.1. Dán maŋŋel riekteministeriija gávnnaha, lágiduvvogo nubbi válga vai ii. Vejolaš nuppi válgga váfistuvvon boađus almmustuhttojuvvo gaskavahkku 14.2. diibmu 18 maŋŋel.
Dásseválddi presideantta virgeáigodat álgá válljema čuovvovaš mánu vuosttaš beaivvi dehe guovvamánu álggus, juos doaimmahuvvo dušše okta válga, dehe njukčamánu álggus, juos doaimmahuvvojit guokte válgga.
Lassidieđut:
válgahoavda Arto Jääskeläinen, tel. 02951 50128, [email protected]
sierraáššedovdi Laura Nurminen, tel. 02951 50008, [email protected]
sierraáššedovdi Elina Rissanen, tel. 02951 50248, ovdanamma. [email protected]
Diehtu ja bohtosat válgasiidduin tulospalvelu.vaalit.fi
- Ovdajienastanbáikkit ja daid rabasáiggit
- Evttohasat ja evttohasnummárat
- Ovddalgihtii jienasteddjiid mearit (beaiváduvvojit diimmu gaskkaid, maid vahkuloahpa)
- Álgorehkenastima ovdáneapmi válgaeahkeda áigge
- Váfistuvvon bohtosat dárkkistanrehkenastima gárváneami maŋŋel disdaga/maŋŋebárgga 30.1.
Dieđut presideanttaválggas ja jienasteamis www.vaalit.fi
Digi- ja álbmotdiehtovirgelágádusa jienastanbáikebálvalus www.aanestyspaikat.fi.
Vaalit.fi Facebookkas https://www.facebook.com/vaalit.fi
Válgavideot YouTubes https://www.youtube.com/user/oikeusministerio/playlists
