Presidentvaaljâ pasepeeivi 28.1.2024
Presidentvaaljâ toimâttuvvoo pasepeeivi 28.1.2024. Vaaljâst jienâvuoigâdvuođâliih Suomâ aalmugjesâneh väljejeh täsivääldi president kuuđâ ive kukkosâš toimâpajan. Iävtukkâsah láá iähtun oles riijkâst.
Presidentvaaljâ äigitavlu
President väljejuvvoo táárbu mield kyevtmuddosáin valjáin. Jis ohtâ iävtukkâsâin finnee vuossâmuu vaaljâst eenâb ko pele adelum jienâin, sun väljejuvvoo njuolgist presidentin. Nubbe vaaljâ uárnejuvvoo, jis ohtâgin iävtukkâsâin ij finnii vuossâmuu vaaljâst paijeel pele jienâin. Máhđulâš nubbe vaaljâ uárnejuvvoo kyevti enâmus jienâi finnim iävtukkâs kooskâst.
Valjâpeivi lii pasepeivi 28.1.2024.
Munejienâstem uárnejuvvoo päikkienâmist 17.–23.1.2024 já olgoenâmijn 17.−20.1.2024.
Máhđulii nube vaaljâ valjâpeivi lii pasepeeivi 11.2.2024.
Munejienâstem uárnejuvvoo päikkienâmist 31.1.–6.2.2024 já olgoenâmijn 31.1.−3.2.2024.
Jienâvuoigâdvuotâ jyehi 18 ihheed tiävdám Suomâ aalmugjesânist
Puáttee vaaljâin jienâvuoigâdvuođâliih láá aassâmsaajeest sorjohánnáá puohah Suomâ aalmugjesâneh, kiäh láá tiävdám 18 ihheed majemustáá 28.1.2024. Máhđulii nube vaaljâst kiävttoo siämmáš jienâvuoigâdvuotâregister ko vuossâmuu vaaljâst adai jienâvuoigâdvuođâliih láá siämmááh.
Digi- já aalmugtiätuvirgádâh lii vuolgâttâm almottâs jienâvuoigâdvuođâst jo-uv reivân pááikán tâi šleđgâlávt Suomi.fi-palvâlusân. Almottâs vuolgâttui šleđgâlávt toid, kiäh láá tiilám virgeomâhâštiäđáttâsâid Suomi.fi-palvâlusân.
Iävtukkâsah
Helsig valjâpirrâdâhlävdikodde nonnij presidentvaaljâ iävtukkâsasâttâllâm 21.12.2023. Iävtukkâsah já sii iävtukkâsnumereh kávnojeh vaaljâi tiätu- já puáđuspalvâlusâst.
Identiteet tuođâštem jienâstemsaajeest
Jienâsteijee kalga adeliđ čielgâdâs identiteetistis jienâstemsaajeest. Identiteet puáhtá tuođâštiđ virgálijn koválijn äššikirjijn, tegu vyeijimkorttáin tâi poolis mieđettem persovnkorttáin já passáin.
Munejienâstem päikkienâmist já olgoenâmijn
Jienâvuoigâdvuođâlâš puáhtá jienâstiđ muuneeld mon peri almolii munejienâstemsaajeest päikkienâmist tâi olgoenâmijn.
Päikkieennâm já olgoeennâm munejienâstemsoojij čujottâsah já ávusorroomääigih kávnojeh vaaljâi tiätu- já puáđuspalvâlusâst já DVV jienâstemsajepalvâlusâst www.aanestyspaikat.fi.
Munejienâstemsoojijd já meiddei eres presidentvaaljân lahtojeijee aašijd puáhtá koijâdiđ meiddei riehtiministeriö mávsuttes puhelinpalvâlusâst:
- suomâkielâlâš palvâlus numerist 0800 9 4770
- ruotâkielâlâš palvâlus numerist 0800 9 4771
- WhatsApp-viestâpalvâlus numerist 050 438 8730.
Olmooš, kiän naavcah lihâdiđ já toimâđ láá nuuvt rájášum, ete sun ij peesâ jienâstemsajan merettes vädisvuođâittáá, puáhtá jienâstiđ muuneeld päihistis. Päikkijienâstmân kalga almottâttâđ jieijâs kieldâ kuávdášvaljâlävdikoodán majemustáá majebaargâ 16.1.2024 ovdil tijme 16.
Olgoenâmijn oles munejienâstemääigi já valjâpeeivi ässeeh tâi orodeijeeh pyehtih jienâstiđ reiváin olgoenâmijn. Jienâvuoigâdvuođâlâš, kote haalijd jienâstiđ reiváin, ferttee tiiláđ reivâjienâstemäššikiirjijd muuneeld olgoenâmáid, toi finnim maŋa jienâstiđ já vuolgâttiđ jienâs Suomân jieijâs kieldâ kuávdášvaljâlävdikoodán. Reivâjienâ ferttee leđe vuástáväldest olmâ kuávdášvaljâlävdikoddeest majemustáá vástuppeeivi 26.1. ovdil tijme 19. Máhđulii nube vaaljâ reivâjienâ kalga leđe vuástáväldest majemustáá vástuppeeivi 9.2.2024 ovdil tijme 19. Täärhib ravvuuh kávnojeh čujottâsâst www.vaalit.fi/kirjeaanestys.
Jienâstem vaaljâpeeivi 28. uđđâivemáánu
Valjâpeeivi puoh jienâstemsajeh láá áávus tijme 9–20. Valjâpeeivi uážžu jienâstiđ tuše jienâvuoigâdvuotâalmottâsân merkkejum jienâstemsaajeest. Jieijâs valjâpeeivi jienâstemsaje puáhtá uuccâđ meiddei čujottâs vuáđuld DVV jienâstemsajepalvâlusâst čujottâsâst www.aanestyspaikat.fi.
Puáttus rekinistem
Munejienâi rekinistem algâttuvvoo jo valjâpeeivi jienâstem ääigi. Valjâpeeivi jienâi vuáđusteijee rekinistem algâttuvvoo tállân valjâviistij steŋgim maŋa. Rekinistmân kyeskee vuáđusteijee tiäđuh almostittojeh valjâehidist tijme 20 rääjist, kuás munejienâi rekinistem lii aigum leđe vaalmâš. Vaaljâi vuáđusteijee puátuseh kiergâneh eehid já iijâ ääigi.
Tärhistemrekinistem čođâldittoo valjâpirrâdâhlävdikuudijn valjâpeeivi čuávuváá vuossaargâ 29.1. Helsig valjâpirrâdâhlävdikodde nannee iävtukkâssáid oles riijkâst adelum jienâi lohomeerijd majebaargâ 30.1. Taan maŋa riehtiministeriö kaavnât, uárnejuvvoo-uv nubbe vaaljâ vâi ij. Máhđulii nube vaaljâ nannejum puáđus almostittoo koskoho 14.2. tijme 18 maŋa.
Täsivääldi president virgepaje álgá valjim čuávvoo mánuppaje vuossâmuu peeivi adai kuovâmáánu aalgâst, jis toimâttuvvoo tuše ohtâ vaaljâ, tâi njuhčâmáánu aalgâst, jis toimâttuvvojeh kyehti vaaljâ.
Lasetiäđuh:
valjâjođetteijee Arto Jääskeläinen, puh. 02951 50128, ovdânommâ.j.suhânommâ@gov.fi
spesialäššitobdee Laura Nurminen, puh. 02951 50008, ovdânommâ.suhânommâ@gov.fi
spesialäššitobdee Elina Rissanen, puh. 02951 50248, ovdânommâ.suhânommâ@gov.fi
Tiäđuh já puátuseh valjâsiijđoin tulospalvelu.vaalit.fi
- Munejienâstemsajeh já toi ávusorroomääigih
- Iävtukkâsah já iävtukkâsnumereh
- Muuneeld jienâstâm ulmui mereh (peividuvvojeh tijme kooskâi, meiddei oholoopâ)
- Vuáđusteijee rekinistem ovdánem valjâeehid ääigi
- Nannejum puátuseh tärhistemrekinistem kiergânem maŋa majebaargâ 30.1.
Tiäđuh presidentvaaljâst já jienâstmist www.vaalit.fi
Digi- já aalmugtiätuvirgáduv jienâstemsajepalvâlus www.aanestyspaikat.fi.
Vaalit.fi Facebookist https://www.facebook.com/vaalit.fi
Valjâvideoh Youtubest https://www.youtube.com/user/oikeusministerio/playlists
