Presidentvaaljâ jienâvuoigâdvuotâalmottâsâi vuolgâttem álgá
Digi- já aalmugtiätuvirgádâh lii vuolgâtškuáttám jienâvuoigâdvuotâalmottâsâid. Almottâs toimâttuvvoo jienâvuoigâdvuođâlâžân jo-uv poostâ peht tâi Suomi.fi-palvâlusân juovlâ-uđđâivemáánu ääigi. Almottâsah vuolgâttuvvojeh majemustáá 4.1.2024.
Presidentvaaljâst jienâvuoigâdvuotâ lii Suomâ jyehi aalmugjesânist, kote lii tiävdám 18 ihheed majemustáá 28.1.2024. Puáttee vaaljâin láá jienâvuoigâdvuođâliih suulân 4,5 miljovnid.
Jo paijeel miljovn jienâsteijed finnejeh jienâvuoigâdvuotâalmottâs Suomi.fi-palvâlusân
Jienâvuoigâdvuotâalmottâsah vuolgâttuvvojeh jo-uv poostâ peht tâi šleđgâlávt jienâvuoigâdvuođâlii jieijâs almottâs mield. Masa niäljádâs jienâvuoigâdvuođâlijn láá tiilám virgeomâhâštiäđáttâsâid šleđgâlávt já almottâs jienâvuoigâdvuođâst vuolgâttuvvoo sijjân tuš Suomi.fi-palvâlusân. Suomi.fi-viestáid puáttám almottâsâid puáhtá luuhâđ tubdâttâtmáin Suomi.fi-nettipalvâlusân tâi luođiimáin kiävtun Suomi.fi-mobilheiviittâs.
Tastko vaaljâ puáhtá leđe kyevti muddoost, te jienâvuoigâdvuođâlâžân vuolgâttuvvojeh presidentvaaljâst kyehti jienâvuoigâdvuotâalmottâs, main láá siämmáš siskáldâs. Tain kávnojeh jienâvuoigâdvuođâlii nommâ, valjâpeivi já valjâpeeivij jienâstempäikki sehe tiäđuh alda orroo munejienâstempaaihijn.
Valjâpeeivi jienâstempäikki meriduvvoo 8.12. aassâmpääihi vuáđuld
Presidentvaaljâ eidusii jienâstempeeivi jienâstempäikki, mii lii siämmáš sehe vuossâmuu já máhđulii nube vaaljâst, meriduvvoo jienâsteijee aalmugtiätuvuáhádâhân merkkejum eidusii aassâmpääihi vuáđuld.
Digi- já aalmugtiätuvirgádâh lii váldám ive 2024 presidentvaaljâ jienâvuoigâdvuotâregister aalmugtiätuvuáháduvâst 8.12.2023. Jienâvuoigâdvuotâregisterân kyeskee vuoigimvátámâš kalga toohâđ Digi- já aalmugtiätuvirgádâhân majemustáá 12.1.2024.
Jis jienâvuoigâdvuođâlâš värree 8.12. maŋa, te jienâstempäikki meriduvvoo oovdeb aassâmpääihi mield.
Presidentvaaljâ vuossâmuu vaaljâst 28.1.2024 já máhđulii nube vaaljâst 11.2.2024 kiävttoo siämmáš jienâvuoigâdvuotâregister. Meid máhđulii nube valjâpeeivi jienâstempäikki meriduvvoo 8.12. čujottâstiäđui vuáđuld.
Uđđâ jienâsteijeeh movtijdittojeh jienâstiđ
Juovlâ-uđđâivemáánust vuolgâttuvvoo reivâ sijjân, kiäh jienâsteih vuossâmuu tove presidentvaaljâst. Reeivâst muštâluvvoo aldaneijee vaaljâin já movtijdittoo kevttiđ jienâvuoigâdvuođâ.
Presidentvaaljâ äigitavlu
Vuossâmuu jienâstem valjâpeivi lii pasepeeivi 28.1.2024.
Munejienâstem uárnejuvvoo Suomâst 17.-23.1.2024 já olgoenâmijn 17.-20.1.2024.
Máhđulii nube jienâstem valjâpeivi lii pasepeivi 11.2.2024.
Munejienâstem uárnejuvvoo Suomâst 31.1.-6.2.2024 já olgoenâmijn 31.1.-3.2.2024.
Presidentvaaljâ valjâpeeivi tun puávtáh jienâstiđ tuš ton jienâstempääihist, mii lohá tuu jienâvuoigâdvuotâalmottâsâst. Munejienâstempääihi tun kuittâg uážuh valjiđ rijjâ.
Lasetiäđuh jienâvuoigâdvuotâregisterist já vuoigimvátámâšâst www.vaalit.fi
Tiäđuh presidentvaaljâst já jienâstmist www.vaalit.fi
Lasetiäđuh Suomi.fi-palvâlusâst
Lasetiäđuh:
valjâhovdâ Arto Jääskeläinen, p. 0295 150 128, ovdânommâ.j.suhânommâ@gov.fi
sierânâsäššitobdee Laura Nurminen, p. 0295 150 008, ovdânommâ.suhânommâ@gov.fi
