Presideʹnttvaali jiõnnvuõiggâdvuõttiʹlmmtõõzzi vuõlttummuš älgg
Digi- da meerteâttkoontâr lij alttääm presideʹnttvaali jiõnnvuõiggâdvuõttiʹlmmtõõzzi vuõlttummuž. iʹlmmtõs tååimtet jiõnnvuõiggâdvuõttnekka juʹna pååʹšt mieʹldd leʹbe Suomi.fi-kääzzkõʹsse jooul-ođđeeʹjjmannu poodd. Iʹlmmtõõzz vuõltteet mââimõõzzâst 4.1.2024.
Presideʹnttvaalin jiõnnvuõiggâdvuõtt lij juâkksast Lääʹddjânnam meerlast, kååʹtt lij teâuddam 18 eeʹǩǩed 28.1.2024 mõõneeʹst. Puõʹtti vaalin liâ jiõnnvuõiggâdvuõttneeʹǩǩ nuʹt-aa 4,5 miljoon.
Juʹn pâʹjjel miljoon jiõnsteei vuäǯǯa jiõnnvuõiggâdvuõttiʹlmmtõõzz Suomi.fi-kääzzkõʹsse
Jiõnnvuõiggâdvuõttiʹlmmtõõzz vuõltteet juʹna pååʹšt mieʹldd leʹbe liâdǥlânji jiõnnvuõiggâdvuõttneeʹǩǩ jiijjâs iʹlmmtõõzz mieʹldd. Âlddsin neelljadvueʹss jiõnnvuõiggâdvuõttniiʹǩǩin lij tiʹllʼjam veʹrǧǧneǩteâđtõõzzid liâdǥlânji da iʹlmmtõs jiõnnvuõiggâdvuõđâst vuõltteet siʹjjid pâi Suomi.fi-saakkpäikka. Suomi.fi-saakkpäikka puättam iʹlmmtõõzzid vuäitt lookkâd tobddeeʹl Suomi.fi-neʹttkääzzkõʹsse leʹbe laaddeeʹl ââʹnnma Suomi.fi-mobiilsuåvldõõzz.
Ǥu vaal vuäitt leeʹd kueiʹtpooddlaž, jiõnnvuõiggâdvuõttnekka vuõltteet presideʹnttvaali kueʹhtt seämmasiiskõõzz õõʹnni jiõnnvuõiggâdvuõttiʹlmmtõõzz. Täin käunnʼje jiõnnvuõiggâdvuõttneeʹǩǩ nõmm, vaalpeiʹvv da vaalpeeiʹvi jiõnstempäiʹǩǩ di teâđ ââlda åårrai ouddjiõnstempaaiʹǩin.
Vaalpeeiʹv jiõnstempäiʹǩǩ meärtââvv 8.12. jälstempääiʹǩ vuâđald
Presideʹnttvaal väʹlddveärlaž vaalpeeiʹv jiõnstempäiʹǩǩ, kååʹtt lij seämma nuʹt vuõssmõs ǥu vueiʹtlvaž nuuʹbbin vaalin, meärtââvv jiõnsteeʹj meerteâttriâžldõʹǩǩe miõrkkum põõšši jälstempääiʹǩ vuâđald.
Digi- da meerteâttkoontâr lij noorrâm eeʹjj 2024 presideʹnttvaal jiõnnvuõiggâdvuõttrekisteeʹr meerteâttriâžldõõǥǥâst 8.12.2023. Jiõnnvuõiggâdvuõttrekisteeʹr kuõskki vuõiǥeemõõlǥtummuš âlgg tuejjeed Digi- da meerteâttkonttra mââimõõzzâst 12.1.2024.
Jõs jiõnnvuõiggâdvuõttneǩ serdd 8.12. mâŋŋa, jiõnstempäiʹǩǩ meärtââvv ääiʹjbu jälstempääiʹǩ meâldlânji.
Presideʹnttvaal vuõssmõs vaalin 28.1.2024 da vueiʹtlvaž nuuʹbb vaalin 11.2.2024 ââʹnet seämma jiõnnvuõiggâdvuõttrekisteeʹr. Še vueiʹtlva nuuʹbb vaalpeeiʹv jiõnstempäiʹǩǩ meärtââvv 8.12. addrõsteâđai vuâđald.
Ođđ jiõnsteeʹjid smeʹllkââʹttet jiõnsted
Jooul-ođđeeʹjjmannust vuõltteet ǩeʹrjj vuõssmõs vuâra presideʹnttvaalin jiõnsteeʹjid. Ǩeeʹrjest čiõlǥtet âlddneei vaalin da smeʹllkââʹttet ââʹnned jiõnnvuõiggâdvuõđ.
Presideʹnttvaal äiʹǧǧtaull
Vuõssmõs jiõnstummuž vaalpeiʹvv lij pâʹsspeiʹvv 28.1.2024.
Ouddjiõnstummuš riâžžât Lääʹddjânnmest 17.-23.1.2024 da ålggjânnmin 17.-20.1.2024.
Vueiʹtlva nuuʹbb jiõnstummuž vaalpeiʹvv lij pâʹsspeeiʹv 11.2.2024.
Ouddjiõnstummuš riâžžât Lääʹddjânnmest 31.1.-6.2.2024 da ålggjânnmin 31.1.-3.2.2024.
Presideʹnttvaal vaalpeiʹvven vuäitak jiõnsted tåʹlǩ tõn jiõnstempääiʹǩest, kååʹtt lååkk tuu jiõnnvuõiggâdvuõttiʹlmmtõõzzâst. Tõn sâjja ouddjiõnstempääiʹǩ vuäitt vaʹlljed jiõčč haaʹleem pääiʹǩest.
Lââʹssteâđaid jiõnnvuõiggâdvuõttrekisteeʹrest da vuõiǥeemõõlǥtummšest www.vaalit.fi
Teâđaid presideʹnttvaalin da jiõnstummšest www.vaalit.fi
Lââʹssteâđaid Suomi.fi-kääzzkõõzzâst
Lââʹssteâđ:
vaaljååʹđteeʹjj Arto Jääskeläinen, teʹl. 0295 150 128, [email protected]
spesiaaläʹšštobddi Laura Nurminen, teʹl. 0295 150 008, [email protected]
