Vuoigatvuođaministeriija rávve dorvvolaš jienasteamis koronaáigge

Vuoigatvuođaministeriija
15.4.2021 10.26 | Julkaistu suomeksi 16.4.2021 klo 12.17
Dieđáhus

Vuoigatvuođaministeriija válgasiidduin vaalit.fi gávdnojit dál jienasteaddjiide rávvagat dorvvolaš jienasteamis koronaáigge. Gielddaválggaid guoskevaš rávvagat lea gárvvásmuvvon ovttasbarggus Dearvvašvuođa ja buresveadjima lágádusain.

Siidduid mihttomearrin lea juohkit álkit logahahtti dieđu dorvvolaš jienastanordnemiin koronaáigge. Ámadadjomáskka ja giehtadesi geavaheapmi lea dehálaš dego maiddái guovtti mehtera dorvogaskka seailluheapmi jienastettiin. Válgavirgeolbmot bearráigehččet dorvvolašvuođa jienastanbáikkis ja rávvejit rávvagiid čuovvumis.

Siidduin muitaluvvo jienasteaddji personvuođa dárkkisteamis. Válgavirgeolmmoš bivdá jienasteaddji váldit ámadadjomáskka oanehaš áigái eret personvuođa gávnnaheapmin. Válgavirgeolbmo ja jienasteaddji gaskkas lea suodjepleksa.

Olbmuid, geain leat vuoigŋanoalledávdamearkkat ja doaktára mearrádus karanteanas, váras leat plánejuvvon sierradoaimmat jienasteami vejolažžan dahkamii. Jienasteaddjit sáhttet jearrat ráđi sierraordnemiin iežaset gieldda guovddášválgalávdegottis.

Vaalit.fi-siidduin maiddái rávavideot

Rávvagat gávdnojit vuoigatvuođaministeriija válgasiidduin, válggaid sosiála media kanálain (Twitter ja Facebook) ja plakáhtain jienastanbáikkiin. Diehtu lea oažžumis suomagillii, ruoŧagillii, eŋgelasgillii ja davvisámegillii.

Vuoigatvuođaministeriija lea buvttadan lassin videoid, main govvidat jienasteami válgalanjain ámadadjomáskkain ja suodjevisiirain. Dát videot gávdnojit vuoigatvuođaministeriija youtube-kanálas suoma-, ruoŧa- ja eŋgelasgillii.

Jienasteaddjiide sáddejuvvojit rávvagat jienasteamis koronaáigge maiddái jietnavuoigatvuođaalmmuhusa mielddusin. Jietnavuoigatvuođaalmmuhusa mielddus lea čállojuvvon suoma- ja ruoŧagillii.

Materiálat fállojuvvojit gielddaid ja media atnui

Materiálat fállojuvvojit gielddaid ja media atnui. Gárvves materiálat sosiála media ja plakáhtaid várás gávdnojit stáhtaráđi govvabáŋkkus.

Koronadilli sáhttá molsašuddat eará guovlluin riikkas

Jus báikkálaš dearvvašvuođavirgeoapmahaččat addet jienasteapmái laktásan ordnemiin čavggabut rávvagiid, dat čuvvojuvvojit vuoigatvuođaministeriija addán rávvagiid sajis.

Lassedieđut:
Ráđđádalli virgeolmmoš Heini Huotarinen, tel. 0295 150 127, [email protected]
Sierraáššedovdi Laura Nurminen, tel. 0295 150 008, [email protected]
Válgahoavda Arto Jääskeläinen, tel. 0295 150 128, [email protected]


Rávvagat dorvvolaš jienasteapmái gielddaválggain koronaáigge
Vuoigatvuođaministeriija válgasiiddut Vaalit.fi
Vuoigatvuođaministeriija youtube-kanála

Gárvves materiálaid gielddaid ja media atnui sáhttá luđet stáhtaráđi govvabáŋkkus