Vuʹvdd- da kåʹddvaal pâʹsspeeiʹv 13.4.2025
Vuʹvdd- da kåʹddvaalid tååimtet pâʹsspeeiʹv 13.4.2025. Ouddjiõnstummuž riâžžât Lääʹddjânnmest 2.–8.4.2025 da ålggjânnmin 2.–5.4.2025.
Vuʹvddvaalin vaʹlljeet välddõsniiʹǩǩid vuʹvddvälddõõzzid, kook vaʹsttee pueʹrrvââjjamvuuʹdi sosiaal- da tiõrvâsvuõttkääzzkõõzzi di peälštemtååim riâššmõõžžâst. Kåʹddvaalin vaʹlljeet välddõsniiʹǩǩid kooʹddi välddõõzzid, kook tuʹmmje kååʹdd toiʹmmjummšest da täälast.
Heʹlssenʼneeʹǩǩ da ålanddneeʹǩǩ lie čårstõk
Heʹlssenʼneeʹǩǩ da ålanddneeʹǩǩ jie jiõnâst vuʹvddvaalin. Heʹlssen gåårad da Ålandd jie kuul ni koon pueʹrrvââjjamvoudda, peʹce tõk âʹnne huõl vuuʹdsteez sosiaal- da tiõrvâsvuõtthuâlast di peälštemtååimast.
Kåʹddvaalid jeät tååimtuku Ålaand mäddkååʹddest seämma ääiʹj ko jeeʹresåʹrnn Lääʹddjânnmest, peʹce pueʹtti vuâra čâhčča 2027.
Ǩeäk vuäiʹtte jiõnsted vuʹvdd- da kåʹddvaalin?
Vuʹvddvaalin jiõnnvuõiggâdvuõttneeʹǩǩ lie pueʹrrvââjjamvuuʹdest jälsteei Lääʹddjânnam, jeeʹres EU-vuäzzlažriikki di Islaant da Taar meerla, kook lie teâuddam 18 eeʹǩǩed mââimõõzzâst vaalpeeiʹv 13.4.2025. Lââʹssen jiõnnvuõiggâdvuõttneeʹǩǩ lie pueʹrrvââjjamvuuʹdest jälsteei 18 eeʹǩǩed teâuddam jeeʹres ålggjânnamneeʹǩǩ, jõs sij lie jälstam Lääʹddjânnmest ǩeäččlõõžži uuʹccmõsân kueʹhtt eeʹjj. Heʹlssenʼniiʹǩǩin ij leäkku jiõnstemvuõiggâdvuõtt vuʹvddvaalin.
Kåʹddvaalin jiõnnvuõiggâdvuõttneeʹǩǩ lie kååʹddest jälsteei Lääʹddjânnam, jeeʹres EU-vuäzzlažriikki di Islaant da Taar meerla, kook lie teâuddam 18 eeʹǩǩed mââimõõzzâst vaalpeeiʹv 13.4.2025. Lââʹssen jiõnnvuõiggâdvuõttneeʹǩǩ lie kååʹddest jälsteei 18 eeʹǩǩed teâuddam jeeʹres ålggjânnamneeʹǩǩ, jõs sij lie jälstam Lääʹddjânnmest ǩeäččlõõžži uuʹccmõsân kueʹhtt eeʹjj.
Lââʹssen jiõnnvuõiggâdvuõttneeʹǩǩ lie tiõttum määinaivuiʹm pueʹrrvââjjamvuuʹdest da kååʹddest jälsteei EU da meeraikõskksaž sieʹbri kääzzkõõzzâst leʹddi oummu da sij piârri vuäzzla.
Digi- da meerteâttkoontâr lij vuõlttääm iʹlmmtõõzz jiõnstemvuõiggâdvuõđâst juʹn-a ǩeʹrjjen domoi leʹbe liâđǥlânji Suomi.fi-kääzzkõʹsse. Juʹn 1,5 miljoon jiõnnvuõiggâdvuõttneʹǩǩed vuäǯǯa täin vaalin jiõnstemvuõiggâdvuõttiʹlmmtõõzzâz Suomi.fi-kääzzkõõzz saaǥǥid.
Võboršeeʹǩǩ
Jiõnsteei jiõnste vuʹvddvaalin pueʹrrvââjjamvuuʹdez võboršiiʹǩǩid da kåʹddvaalin dommkååʹddez võboršiiʹǩǩid.
Juõʹǩǩ võboršeeʹǩǩest lij jiijjâs võboršeǩnââmar. Vuʹvddvaali võboršiiʹǩǩi nââmar äʹlǧǧe nââmrest 2002 da kåʹddvaali võboršiiʹǩǩi nââmar äʹlǧǧe nââmrest 2. Teâđ võboršiiʹǩǩin käunnʼje neeʹttest vaali teâtt- da puäđõskääzzkõõzzâst.
Peällõkrekisteera mieʹrǩǩuum peällõõǥǥ da jiõnnvuõiggâdvuõttniiʹǩǩi vuâđđeem vaʹlljeemõhttõõzz vuäiʹtte piijjâd võboršiiʹǩǩid.
Identiteeʹtt tuõđštummuš jiõnstempääiʹǩest
Jiõnsteei âlgg puʹhtted ouʹdde čiõlǥtõõzz identiteeʹttstes jiõnstempääiʹǩest. Identiteeʹtt vuäitt tuõđšted veerǥlaž äʹššǩiiʹrjin, mâʹst lij snimldõk, mâʹte vuejjamkoortin leʹbe pååʹlez miõttâm persoonkoortin da paassin.
Ouddjiõnstummuš Lääʹddjânnmest da ålggjânnmin
Jiõnstemvuõiggâdvuõttneǩ vuäitt jiõnsted ouddǩiõʹtte koon täättas ouddjiõnstempääiʹǩest Lääʹddjânnmest leʹbe ålggjânnmin.
Lääʹddjânnam da ålggjânnam ouddjiõnstempaaiʹǩi addrõõzz da äävaiåårramääiʹj käunnʼje vaali teâtt- da puäđõskääzzkõõzzâst di Digi- da meerteâttkonttâr jiõnstempäiʹǩǩ-kääzzkõõzzâst www.aanestyspaikat.fi.
Ouddjiõnstempaaiʹǩid da jeeʹres aaʹššid, kook õhttne vuʹvdd- da kåʹddvaalid, vuäitt teâđstõõllâd vuõiggâdvuõttministeria määusteʹmes teʹlfonkääzzkõõzzâst:
• lääʹddǩiõllsaž kääzzkõs nââmrest 0800 9 4770
• ruõccǩiõllsaž kääzzkõs nââmrest 0800 9 4771
• WhatsApp-saakk-kääzzkõs nââmrest 050 438 8730.
Ooumaž, koon pâstlvažvuõtt liikkeed da tåimmad lij nuʹtt rääʹjtõõvvâm, što son ij piâzz toolkteʹmes vaiggâdvuõđitää jiõnstempäikka, vuäitt jiõnsted ouddǩiõʹtte dååma. Dommjiõnstummša âlgg iʹlmmtõõttâd jiijjâs kååʹdd väʹlddvaal-luʹvddkådda mââimõõzzâst mââibaarǥ 1.4.2025 ouddâl čiâss 16.
Oummu, kook jälste leʹbe ååree čõõđ ouddjiõnstempââʹj da vaalpeeiʹv ålggjânnmin, vuäiʹtte jiõnsted ålggjânnmin ǩiiʹrjin. Jiõnstemvuõiggâdvuõttneǩ, kååʹtt haaʹlad jiõnsted ǩiiʹrjin, âlgg tiʹllʼjed ǩeʹrjj-jiõnstemäʹššǩiiʹrjid ouddǩiõʹtte ålggjânnmid. Ko son lij vuäǯǯam ǩeeʹrj, son âlgg jiõnsted da pååʹštʼted jiõnâs Lääʹddjânnma kååʹddes väʹlddvaal-luʹvddkådda. Ǩeʹrjj-jiõnn âlgg dooidâd jiijjâs domm- leʹbe aalmiǩeeʹrjtuõʹllʼjemkååʹdd väʹlddvaal-luʹvddkådda mââimõõzzâst piâtnâc 11.4.2025 ouddâl čiâss 19. Tääʹrǩab vuäʹppõõzz käunnʼje addrõõzzâst www.vaalit.fi/kirjeaanestys.
Jiõnstummuš vaalpeeiʹv njuhččmannu 13. peeiʹv
Vaalpeeiʹv puk jiõnstempääiʹǩ lie äävai čiâss 9–20. Vaalpeeiʹv vuäitt jiõnsted tåʹlǩ Lääʹddjânnmest da tåʹlǩ jiõnstemvuõiggâdvuõttiʹlmmtõʹsse mieʹrǩǩuum jiõnstempääiʹǩest. Jiijjâs vaalpeeiʹv jiõnstempääiʹǩ vuäitt ooccâd še jiijjâs põõšši addrõõzz vuâđald Digi- da meerteâttkonttâr jiõnstempäiʹǩǩ-kääzzkõõzzâst addrõõzzâst www.aanestyspaikat.fi.
Puäđõslaʹsǩǩummuž altteet vaalpeeiʹv da vaali ravvuum puäđõõzzid vuäǯǯat se 16.4.
Puäđõslaʹsǩǩummuš älgg vaalpeeiʹv. Ouddjiõni lookkmõõžž altteet jiõnstummuž ääiʹj da vaalpeeiʹv jiõni vuâđđeei lookkmõõžž altteet tâʹlles, ko vaal-lõõnj mâʹnne ǩidd. Laʹsǩǩummuž kuõskki teâđaid õlmstââʹttet vaaljeäʹǩǩää čiâss 20 ääʹljeeʹl. Vaali vuâđđeei puäđõõzz valmštâʹvve jeäʹǩǩää da iinn ääiʹj. Vuʹvdd- da kåʹddvaalin lie jiânnai võboršeeʹǩǩ, mii vuäitt meälǥted puäđõõzzi vuäǯǯmõõžž vaaljeäʹǩǩää.
Vuʹvdd- da kåʹddvaali jiõni täʹrǩstemlookkmõš šâdd vaalpeeiʹv mâŋŋa pueʹtti vuõssaarǥ 14.4. Vaali ravvuum puäđõõzzid vuäǯǯat seärad 16.4.
Vaalin vaʹlljuum vuʹvddvälddõõzzi da kooʹddi välddõõzzi tåimmpââʹjj älgg ǩieʹssmannu 1. peeiʹv 2025.
Lââʹssteâđ:
spesiaaläʹšštobddi Laura Nurminen, teʹl. 02951 50008, ouddnõmm.sokknõ[email protected]
spesiaaläʹšštobddi Elina Rissanen, teʹl. 02951 50248, ouddnõmm.sokknõ[email protected]
vaaljååʹđteei Arto Jääskeläinen, teʹl. 02951 50128, ouddnõmm.j.sokknõ[email protected]
Vaali teâtt- da puäđõskääzzkõs
- Ouddjiõnstempääiʹǩ da tõi äävaiåårramääiʹj
- Võboršeeʹǩǩ da võboršeǩnââmar
- Ouddǩiõʹtte jiõnstam oummui meäʹr (peeiʹvtet čiâss kõõski, neäʹttel-loopp še)
- Vuâđđeei lookkmõõžž ouddnummuš vaaljeäʹǩǩää ääiʹj
- Ravvuum puäđõõzz, ko täʹrǩstemlookkmõš lij valmštõõvvâm se 16.4.
Teâđ vuʹvdd- da kåʹddvaalin di jiõnstummšest
Digi- da meerteâttkonttâr jiõnstempäiʹǩǩ-kääzzkõs
Pueʹrrvââjjamvuuʹd ooccâmkääzzkõs
Vaalit.fi Facebookâst
Vaalvideo Youtubest
